Astana ákimi Áset Isekeshevtiń ákimdik aldyndaǵy kólik turaǵyna qatysty bergen jaýaby prezident Nursultan Nazarbaevtyń kúlkisin keltirdi, dep habarlaidy Sputnik Qazaqstan tilshisi.
Astanany damytý máseleleri jónindegi otyrysta Nursultan Nazarbaev kólik turaqtaryna qatysty jaǵdaidyń kóńil kónshitpeitinin aitty. Prezident "Nurly jol" aýdanyndaǵy jáne qalalyq ákimdik janyndaǵy kólikke lyq toly turaqtardy kórsetti.
"Seniń kóz aldyńda osyndai beibereket jaǵdai bolyp jatsa, basqasy týraly ne aitýǵa bolady?", — dedi memleket basshysy Isekeshevke qarata.
"Nursultan Ábishuly, ol kúni úlken jinalys bolǵan sekildi", — dep saspady qala ákimi.
"Seni ańdyp júrip, ustap alǵan sekildi ǵoi", — dep kúldi Nazarbaev.
Isekeshev biyl Astana ákimdiginiń aldynda eki myń orynǵa shaqtalǵan jerasty turaq salý bastalatynyn aitty.
"Bul máseleni sheshý kerek. Qurylys komaniialaryn jerasty kólik turaqtaryn salýǵa mindetteý kerek. Astanadan da úlken qalalar bar ǵoi, olar máseleni sheship jatyr", — dedi Nazarbaev.
Nazarbaevtyń aitýynsha, qala biligi turaq úshin aqsha almaidy, sondyqtan tártip joq.
"Tólesin. "Mersedes" alýǵa aqshasy bolsa, turaq úshin de tólesin. Tólemese, aiyppul salyńdar. Sonda ǵana tártip bolady, avtobýstarǵa otyrady. Biraq avtobýstar jaqsy bolýy kerek", — degen Elbasy osyndai turaqtar jedel járdem, órt sóndirý kólikterine bóget bolatynyn aitty.
