Qazaqstan Respýblikasy Prezidentiniń kómekshisi – Qaýipsizdik Keńesiniń hatshysy Áset Isekeshev koronavirýspen kúreste Úkimet, ákimder, Prezident apparaty, Qaýipsizdik Keńesiniń apparaty biryńǵai shtab retinde táýlik boiy jumys istep jatqanyn málim etti, dep habarlaidy "Ult aqparat".
«Keshe Memlekettik komissiia tótenshe jaǵdailardyń aldyn alýdy qamtamasyz etý maqsatynda úshinshi otyrysyn ótkizdi. Úkimet, ákimder, Prezident apparaty, Qaýipsizdik Keńesiniń apparaty biryńǵai shtab retinde táýlik boiy jumys isteýde. Monitoring, taldaý, karantin, tamaq, dári-dármektermen jáne jeke qorǵanys quraldarymen qamtamasyz etý, jolaýshylardy tasymaldaýdyń jańa jaǵdailarda jumys isteýi, basqa da máseleler boiynsha jedel sheshim qabyldaý suraqtary nazarda. Bizdiń azamattarymyzdyń shetelden oralýy erekshe baqylaýda», - dep jazdy Áset Isekeshev Facebook-tegi paraqshasynda.
Qaýipsizdik Keńesiniń hatshysy 2020 jyldyń 22 naýryzynda saǵat 00.00-den bastap karantinniń engizilýine bailanysty Nur-Sultan jáne Almaty qalalarynyń barlyq beketterinde poiyz júrisi toqtatylatynyn málim etti. Bul tranzittik poiyzdarǵa da qatysty. Trafikti qalpyna keltirý týraly keiinirek habarlanady. Ázirge reisi toqtatylǵan poiyz biletteriniń ieleri aqshalaryn tolyq qaitara ala alady.
«Maskalarǵa keletin bolsaq: Qazaqstanda 48 maska óndirýshi bar. Bir ǵana 17 naýryzda jalpy 300 myńnan astam maska shyǵaryldy. Olardyń qoimalarynda qazir 760 myń maska bar. Saýda núktelerinde jetkizý úzdiksiz júzege asyrylady. Eksportqa tyiym salynǵan. Bir sózben aitqanda, maska jetýi úshin barlyq sharalar qoldanylýda. Eger siz maskalar nemese antiseptikterdi qymbat baǵaǵa satý týraly aqparatqa tap bolsańyz, + 7-7172-70-84-78 jáne + 7-7172-31-61-45 nómirlerine habarlasyńyz. Bul Qarjylyq baqylaý komitetiniń senim telefony», - dep jazady ol.
Áset Isekeshev áleýmettik jelilerdegi karantindi talqylaýdy muqiiat qadaǵalaýda ekenin jetkizdi. Barlyq máseleler boiynsha dereý tiisti oryndar (Ákimdikter, Ishki ister ministrligi, Densaýlyq saqtaý ministrligi jáne basqalar) aqparat beredi.
«Sóz sońynda aitarym, dárigerlerdiń, politsiianyń, áskeri jáne basqa da qyzmetkerlerdiń jumysyna janashyrlyqpen qarańyzdar. Jaǵdai kúrdeli, birinshi ret karantin engizildi, barlyǵy halyqtyń qaýipsizdigi úshin jasaldy! Ótinish - jalǵan sózder men qaýesetterge senbeńizder, karantin rejimin saqtańyzdar. Kópshilik ortada kem degende eki metr qashyqtyqty ustańyz. Qolyńyzdy jii jýyńyz. Eger qajet bolmasa, úiden shyqpaǵan durys. Tumaý belgileri bolsa dereý dárigerge habarlańyzdar jáne olardyń nusqaýlaryn naqty oryndaǵan jón. Virýstyń taralýyn toqtatý - bizdiń óz qolymyzda. Saqtanyp júreiik. Abai bolyńyzdar», - dep jazdy Áset Isekeshev.
