Almatyda «Qazaqstandaǵy quqyq qorǵaý jáne sot júiesin jańǵyrtýdyń ózekti máseleleri» atty halyqaralyq dóńgelek ústel barysynda Áset Isekeshov quqyq qorǵaý organdarynyń modernizatsiiasy týraly aitty, dep habarlaidy "Ult aqparat".
Dóńgelek ústeldiń moderatory Qazaqstan kriminologiialyq qaýymdastyǵynyń qurmetti prezidenti, QR Tuńǵysh Prezidenti Nursultan Nazarbaev qorynyń atqarýshy direktory Igor Rogov Qazaqstannyń sot-quqyqtyq júiesiniń jyldan jylǵa jetilip kele jatqanyn tilge tiek etti.
«Sońǵy iri reforma 2014 jyly jasaldy. Jańa býynnyń qylmystyq jáne qylmystyq protsessýaldyq kodeksi qabyldandy. Bul kodekster Qazaqstandy eýropalyq modelge jaqyndatyp kele jatyr», - dedi Igor Rogov.
QR Prezidentiniń kómekshisi, Qaýipsizdik keńesiniń hatshysy Áset Isekeshev sot-quqyqtyq júiesiniń reformasy tek qana sheteldik ozyq úlgini engizý ǵana emes, tereń ǵylymi zertteýlerge negizdelýi kerek ekenin aitty.
«Qazaqstanda basty mańyzdy reformalardyń biri zań qaǵidasynyń engizilýi. Zań bárinen biik bolýy kerek. Quqyqtyq memlekette sot júiesi ádil bolady. Al quqyq qorǵaý júiesi halyq senimine negizdelýi kerek. Bul 5 institýtsionaldy reforma aiasyndaǵy uzaq merzimdi meje bolyp tabylady», - dedi ol.
Onyń aitýynsha, biyl Memeleket basshysy Qasym-Jomart Toqaev biylǵy Joldaýynda Qazaqstannyń quqyqtyq júiesin reformalaýdyń basty baǵyttaryn ataǵan.
«Sońǵy 25 jylda aýyr qylmystar sany birneshe ese azaidy. 1996 jyly 2600 adam ólimi tirkelse, 2019 jyly 845 qylmys tirkeldi. Qaraqshylyq tonaý qylmystary 6 ese azaiǵan», - dedi ol.
Onyń aitýynsha, Qazaqstan beibitshilik boiynsha álemdik reitingte 64-orynǵa taban tiregen.
«Bul memlekettiń kóp jyldyq jumysynyń nátijesi. Bir-birimen tyǵyz bailanysty júielerdiń reformasynyń qoǵam úshin ózektiligi joǵary bolyp otyr», - dedi Á.Isekeshev.
Prezident keńesshisi qoǵam tarapynan, biznes tarapynan quqyq qorǵaýshylar men sot jumysyna kóńil tolmaityn jaǵdailar jii kezdesetinin aitty.
«Sot jáne quqyq qorǵaý salasynda kez-kelgen qatelik qoǵam tarapynan kóp talqyǵa túsedi. Kei kezderi bul talqylaý teris kózqarastardy týdyryp jatady. Sot júiesin reformalaýǵa barynsha muqiiat bolý kerektigi aiqyn», - dedi spiker.
Áset Isekeshev Prezident ákimshiligi janynan osy maqsatta arnaiy komissiia qurylǵanyn jetkizdi.
«Komissiia quramyna memlekettik organdar, ǵalymdar, quqyqtanýshylar, advokattyq keńse ókilderi kirgen. Jumys barysynda halyqaralyq tájiribe zerttelip jatyr. Ásirese azamattardyń shaǵymyna, BAQ pen áleýmettik jeli jazbalaryna mán berilip jatyr», - dedi ol.
Prezident keńesshisiniń aitýynsha, birinshiden, sot sýdialarynyń shynaiy táýelsizdigi, kásibi sheberligi mańyzdy. Bul - elimizde jaǵymdy biznes klimat qalyptastyrýdyń mańyzdy faktory.
«Ekinshiden, progressivti qylmystyq kodeks. Biz osy oraida damýdyń basty vektoryn kórip turmyz. Zańnyń mártebesi biik elderdiń ekonomikasy da tez básekege qabiletti dárejege jetkenin kórip otyrmyz. Úshinshiden, jumystyń servistik modeline aýysý. Quqyq qorǵaý organdary servistik qurylymǵa ainalýy kerek», - dedi ol.
