Isekeshev qaladaǵy keptelisterge qatysty aitylǵan synǵa jaýap berdi, - dep habarlaidy Ult.kz tilshisi. Astana qalasynyń ákimi ákimdiktegilerdiń qolaisyz aýa raiyna qalai daiyndalǵany jaily Facebook jelisindegi paraqshasynda jazdy.
"Qaiyrly kún! Mine, qar da keldi. Biz mundai aýa raiyna daiyndaldyq, barlyq tehnikany tekserip, marshrýttardy qaita qarap shyqtyq. Demalys kúnderi 21 millimetrden asa qar jaýdy. Osyǵan bailanysty 369 mashina jumys istep, 26,200 sharshy metr qar tazartyldy. Aýa raiynyń birden ózgerýi jol qozǵalysyna da áser etedi. Birinshi kezekte jol-kólik oqiǵalarynyń sany artty. Búgin tańerteńnen beri qalada 26 jol-kólik oqiǵasy bolsa, bir táýliktiń ishinde 100-den asa jol apaty boldy. Jol apattaryna jyldamdyqty saqtamaý, kólikter arasyndaǵy araqashyqtyqtyń saqtalmaýy men kólikterdiń qaýipti áreketteri sebep bolǵan. Aita ketý kerek, Máskeýde de kóp mólsherde qar jaýyp, saldarynan 900 jol-kólik oqiǵasy boldy", - dedi Astana ákimi.
Sondai-aq, Áset Isekeshev Astanadaǵy kommýnaldyq qyzmettegilerdiń jumysynyń áli de kúsheitilgen tártipte jumys isteitinin aitty.
"Tańǵy jáne keshki ýaqytta men orynbasarmen jáne aýdan ákimderimen birge qalany aralap, atqarylyp jatqan jumystardy baqylmaimyz. Iaǵni, osy kezde qalada qar tazalanyp, qoǵamdyq kólikter ádettegidei jumys istep, qala turǵynlary jylýmen, jaryqpen jáne sýmen qamtamasyz etilýi qajet. Qolaisyz aýa raiyna bailanysty turǵyndardy túsinistekpen qaraýǵa jáne júrgizýshilerden jyldamdyq pen araqashyqtyqty saqtai otyryp, abai bolýlaryn suraimyz", - dedi Astana ákimi qala turǵyndaryna.
Eske sala keteiik, osyǵan deiin QR premer-ministri Baqytjan Saǵyntaev Astana ákimi Áset Isekeshevti joldardaǵy qar men keptelister úshin sókken bolatyn. Sebebi, búgin, 14 qarashada elordada jaýǵan qardan qalada keptelister paida bolǵan edi. Ótken táýlikte jaýǵan qardyń saldarynan kommýnaldyq qyzmettegilerdiń de jumysy kóbeigen. Elorda turǵyndary qolaisyz aýa raiyna bailanysty jol keptelisinde turǵan qoǵamdyq kólikterdi kútýge májbúr bolǵan
