Astana qalasynyń ákimi Áset Isekeshev qala turǵyndary men qonaqtaryn Jańa jylmen quttyqtady, dep habarlanǵan jergilikti ákimdik saitynda.
"Halqymyz it jylyn jaqsylyqtyń, bereke men tatýlyqtyń jarshysy dep qabyldaǵan. Bizdiń de keler jyldan kúterimiz kóp, ótken jylǵa ókpemiz joq. 2017 jyl Astana úshin tabysty boldy. Ekonomika, mádeniet, týrizm jáne áleýmettik salalarda damýdyń oń dinamikasyna qol jetkizildi. EKSPO kórmesin joǵary deńgeide ótkizdik. Munyń bári Elbasymyzdyń aldymyzǵa qoiǵan naqty tapsyrmalary men barsha astanalyqtardyń qajyrly eńbeginiń arqasy", — deidi Isekeshev.
Ol keler jyly elordamyzdyń Alataý baýraiynan Arqa tósine kóshkenine jiyrma jyl tolatynyn atap ótti. Aitýynsha, bul ótkenimizdi saralap, keleshekti baǵamdaityn mańyzdy sát.
"Jiyrma jylda Astana qalasy adam tanymastai ózgerdi. Astanany damytýdyń uzaq merzimdik jospary óz merziminde oryndalyp keledi. Jańa 2018 jyl da elimiz ben Elorda tarihynda mańyzdy ózgeristermen este qalady dep senemin!" – degen Astana ákimi qazaqstandyqtarǵa jańa jylda jańa tabys, mol baqyt tiledi.
