Astana qalasynyń ákimi Áset Isekeshev elordany 2 million turǵyny bar qala etýge daiyndyqtyń bastalǵanyn, iaǵni arnaiy baǵdarlamanyń júzege asyrylyp jatqanyn aitty, dep habarlaidy QazAqparat tilshisi.
Resmi sanaq boiynsha Astanada búginde 1 mln 200 myń adam turady. Jyl sanap qala turǵyndarynyń sany artýda, osy turǵyda Elbasy 2 mln turǵyny bar qala bolýǵa daiyndalýdy tapsyrǵan bolatyn.
«Biz qalany damytýda 20 qadamnan turatyn baǵdarlama jasap shyǵardyq. Búgingi kúnde basty eki baǵytpen jumysty bastadyq. Birinshi baǵyt: qala turǵyndary úshin qaýipsizdik pen jailylyq, ekinshisi jol jáne kólik qatynasyn qamtidy. Negizi 20 qadam baǵdarlamasy barlyq salany qamtidy, sol salalardyń biri kóliktik mobildilik. Bul degenimiz qoǵamdyq kólikterdiń qaýipsizdigi men jailylyǵy, jaiaý jáne velojúrginshilerge arnalǵan joldardyń qaýipsizdigi, baǵdarshamdar júiesi jáne barlyq qalalardyń problemasy bolyp tabylatyn keptelisti azaitý. Jol transporty máselelerin sheshýde biz álemniń iri megapolisteri Máskeý, Dýbai, Singapýr qalalarynyń úzdik tájiribelerine súiendik. Degenmen halyq sanymen qatar kólikter de kebeiýde. Aitar bolsaq búginde qala ishi men mańaiyn qosa eseptegende bir kúnde 400 myńnan asa, al mereke kúnderi 500 myńnan asa kólik júredi, - dedi Áset Isekeshev.
Onyń sózinshe, Astana halqyn 2 mln-ǵa jetkizý maqsaty resmi baǵamdaý boiynsha 2030 jylǵa belgilengen. Alaida qala turǵyndaryn tirkeýdegi jedel baǵamdaý boiynsha bul maqsatqa 2030 jylǵa deiin jetýimiz múmkin.
Sonymen qatar qala ákimi Táýelsizdik saraiynan jańa «Nurly jol» vokzalyna deiin jańa «Myń jyldyq» alleiasy qurylysynyń bastalǵanyn atap ótip, onda aldaǵy 5 jyl kóleminde bútin bir qalashyq turzylatynyn aitty. Odan bólek qalanyń basty kólik aǵyny ótetin Máńgilik El, Turan, Qabanbai batyr dańǵyldarynan úlken jáne kishi ainalma joldar salý qurylysy qolǵa alyndy.
Aita keteiik, atalǵan jobalardy aiaqtaý 2020 jylǵa josparlanǵan.
