"Astana qalasynyń ákimi Áset Isekeshev kommýnaldyq múlik nysandaryn básekelestik ortaǵa berý máseleleri boiynsha keńes ótkizdi", - dep habarlaidy Ult.kz tilshisi QazAqparat agenttigine silteme jasap.
Oǵan memlekettik kommýnaldyq qazynashylyq kásiporyndaryn aýktsion arqyly satý máselesi sebep bolǵan.
Áset Isekeshev nysandardyń áleýmettik mańyzdylyǵyn eskere otyryp, áleýmettik bul máseleni muqiiat pysyqtaýdy, quqyqtyq baǵa berý úshin saýda boiynsha materialdardy qalalyq prokýratýraǵa jiberýdi, sondai-aq, qala ákimdiginiń tiisti basqarmalaryna barlyq jekeshelendirý nysandary boiynsha tolyq aqparatty jariia etýdi, aldaǵy ýaqytta josparlanǵan saýdalar týraly aqparatty keńinen taratýdy tapsyrdy.
Qala ákiminiń tapsyrmasy boiynsha, búgin saǵat 16.00-de ákim orynbasary Andrei Lýkin arnaiy baspasóz máslihatyn ótkzedi.
Buǵan deiin habarlaǵanymyzdai, «Astana» kókpar klýby» memlekettik kommýnaldyq-qazynalyq kásipornynyń aýktsion arqyly jekemenshikke satyldy. Gollandiialyq ádispen saýda-sattyqa salynǵan klýbtyń menshiginde asyl tuqymdy 11 at, qyzmettik kólikter, infraqurylym, turǵyn-jailar men at ábzelderi bolǵan. Sonyń barlyǵyn «qupiia adam» bar bolǵany 200-aq myń teńgege satyp alypty. Tańǵalarlyq aýktsionnyń ótkenin tipti klýb basshylyǵy da bilmei qalǵan. Atalǵan nysannyń áleýmettik mańyzdylyǵy sol, onyń janynda at ónerine úirenetin mektep bolǵan. Onda 140-qa jýyq bala dáris alyp júrdi. Osy ýaqytqa deiin mekteptiń qol jetkizgen jetistikteri de az emes.
«Astanadaǵy kommýnaldyq múlik pen memlekettik satyp alýlar basqarmasy at sporty klýbyn aýktsionǵa salyp, satyp jiberipti. Úsh aýktsion ótken. Úshinshisin gollandiialyq ádispen, iaǵni baǵany tómendetý arqyly 198 700 teńgege belgisiz bireýge sata salypty. Sonda bir atty 20 myń teńgeden baǵalaǵan eken. Al negizinde ol asyl tuqymdy attardyń naryqtaǵy baǵasy júz ese qymbat. Bireýi 5 myń dollar turady. Aty turmaq bir ertoqymnyń ózi 350 myń teńge bolatyn. Munyń syrtynda qyzmettik kólikter siiaqty múlikter taǵy bar», - deidi «Tulpar» ippodromy direktorynyń orynbasary Bolat Shalabaev «QazAqparatqa» bergen suhbatynda.
