QR Premer-Ministri Asqar Maminniń tóraǵalyǵymen ótken Úkimet otyrysynda ulttyq ekonomika ministri Rýslan Dálenov kásipkerlikti jáne otandyq óndiristi qoldaý sharalary týraly baiandady, dep habarlaidy "Ult aqparat" primeminister.kz saityna silteme jasap.
Ulttyq ekonomika ministriniń aitýynsha, Memleket basshysynyń biznesti qoldaý jáne eńbek naryǵynda turaqtylyqty qamtamasyz etýge qatysty tapsyrmasyn oryndaý úshin 7 negizgi baǵyttan turatyn jedel sharalar toptamasy ázirlenýde. Bul qoljetimdi qarjylandyrý, kepildikter berý, salyqtyq yntalandyrý jáne biznesti tekserýlerdi azaitý, sondai-aq halyqty jumyspen qamtamasyz etý.
Birinshi baǵyt boiynsha «Biznestiń jol kartasy-2025» jáne «Qarapaiym zattar ekonomikasy» baǵdarlamalaryn sinhrondaý sheńberinde kásipkerler úshin teńgelik qarjylandyrýǵa qoljetimdilikti arttyrý kózdeletin bolady.
Birinshiden, nesielendirý 1 trln teńgege deiin 400 mlrd teńgege ulǵaiatyn bolady. Qarajat, eń aldymen, importqa táýeldilikti tómendetý jáne azyq-túlik qaýipsizdigin qamtamasyz etý úshin otandyq ónim óndirýshilerge beriletin bolady.
«Biznestiń jol kartasy-2025» memlekettik baǵdarlamasy boiynsha nesieniń joǵarǵy shegi 7 mlrd teńgege deiin ulǵaiady. Aǵymdaǵy shyǵystardy jabý úshin biznestiń ainalym qarajatyn qarjylandyrýdy keńeitý usynylady.
Ekinshiden, nesieler boiynsha túpkilikti syiaqy mólsherlemesi bir qalypqa keltiriledi jáne 6%-dy quraidy.
Úshinshiden, «Biznestiń jol kartasy-2025» baǵdarlamasynda salalyq shekteýler alynatyn bolady jáne «Qarapaiym zattar ekonomikasy» baǵdarlamasynda basym taýarlar tizbesi keńeitiletin bolady.
«Ekinshi baǵyt aiasynda kepilderdiń jetispeýshiligi máselesin sheshý úshin, “Biznestiń jol kartasy-2025” baǵdarlamasy sheńberinde orta bizneske kredit somasyn 1 mlrd teńgege deiin arttyrý usynylady, ol boiynsha 50% mólsherinde kepildendirý beriletin bolady. Mikro jáne shaǵyn biznes úshin 85%-ǵa deiin kepildik berýmen nesie somasyn 360 mln teńgege deiin arttyrý usynylady. Jalpy kepildik berý tetigi ońailatylatyn bolady», — dedi R. Dálenov.
Úshinshi baǵyt boiynsha osy kezeńde orta biznesti tekserý sanyn tómendetý usynylady. Qazirgi ýaqytta mikro jáne shaǵyn biznesti tekserýge moratorii qoiylǵanyn atap ótken jón.
Tórtinshi baǵyt aiasynda shaǵyn jáne orta biznestiń jekelegen sanattary úshin salyqtyq yntalandyrýlar kózdeledi. Bul - iri saýda obektileri, kinoteatrlar, teatrlar, kórmeler, sport obektileri.
Bul sanattaǵy zańdy tulǵalar jáne jeke kásipkerler úshin bir jylǵy merzimine múlik salyǵynan bosatý usynylady. Bir toqsanǵa ósimpul esepteýdi toqtatý kerek. 3 toqsan úshin salyqtyq eseptilik merzimin aýystyrý qajet.
Besinshi baǵyt agroónerkásiptik keshen sýbektilerin nesielendirýdi ulǵaitýdan basqa salyqtyq yntalandyrýlar kózdeledi. Munda iri qara tóldeitin maldy, asyl tuqymdy balapandardy qamtityn biologiialyq aktivterdiń importyna salynatyn qosylǵan qun salyǵynan bosatý boljanǵan. Sondai-aq shamamen 7 myń aýyl sharýashylyǵy ónimderin óndirýshileri aýyl sharýashylyǵyna arnalǵan jerlerge salynatyn salyqty tóleýden bosatylatyn bolady.
Altynshy baǵyt aiasynda jalpyǵa birdei belgilengen rejimde jumys isteitin jeke kásipkerlerdi salyqtan bosatý usynylady.
«Arnaiy salyq rejimderi boiynsha jumys isteitin kásipkerlerdiń kiristeri osy jyldyń basynan bastap salyqtan bosatylǵanyn atap ótken jón. Jalpyǵa birdei belgilengen rejimdi paidalanatyn kásipkerlerdi qoldaýǵa bolady dep sanaimyz», — dedi ministr.
Sonymen qatar R. Dálenov jetinshi baǵyt aiasynda eńbek naryǵynda turaqtylyqty qamtamasyz etýge baǵyttalǵan jańa Jumyspen qamtý jol kartasy ázirlenip jatqanyn aitty. Jalpy qarjylandyrý 300 mlrd teńgeni quraidy. Ótkizilgen skrining nátijeleri boiynsha iriktelgen óńirlerdegi jańa infraqurylymdyq jobalardy iske asyrý esebinen 120 myń jumys orny qurylatyn bolady. Mundai jobalardy iske asyrý joldardy, kópirlerdi jóndeý, turǵyn úi kommýnaldyq sharýashylyǵy jáne áleýmettik infraqurylym obektilerin rekonstrýktsiialaý siiaqty halyqtyń eń ózekti problemalaryn sheshýge múmkindik beredi.
«Keshe Memleket basshysy televiziia arqyly jasalǵan úndeýinde atap ótkendei, kásipkerlikti qoldaýǵa jáne jańa jumys oryndaryn qurýǵa kem degende 300 mlrd teńge bólinetin bolady. Nesielerdi sýbsidiialaý jáne salyqtyq yntalandyrýlardy berý máseleleri qosymsha pysyqtaldy, sondai-aq “Qarapaiym zattar ekonomikasy” baǵdarlamasy sheńberinde 400 mlrd teńgege deiin qosymsha teńgedegi ótimdilik beriletin bolady. Qyzmettik belsendilikti saqtaýdan basqa 160 myń jańa jumys orny qurylady. Jalpy, atalǵan jedel sharalar eńbek naryǵyna jáne ekonomikaǵa turaqtandyrý áserin beredi», — dep túiindedi R. Dálenov.
