Shyǵys Qazaqstan oblysy Aiagóz qalasynyń ákimi iri kólemde para alǵany úshin 4 jyl 5 aiǵa bas bostandyǵynan aiyryldy, dep habarlaidy "Ult aqparat".
Aiagóz aýdandyq soty baspasóz qyzmetiniń málimetine súiensek, Aiagóz qalasynyń burynǵy ákimine qatysty QR QK-niń 366-baby 2-bóligine sáikes qylmystyq is qaraldy.
«Anyqtalǵandai, sottalýshy qala ákimi laýazymyn atqaryp júrip, 2020 jyldyń 16 jáne 17 qyrkúieginde sý tasqynynan zardap shekken úilerdi qalpyna keltirý boiynsha atqarylǵan jumystyń aktisine qol qoiǵany úshin merdiger uiymnan jalpy somasy 1 200 000 teńge mólsherinde eki ret para alǵan. Ol aqshany alyp jatqan sátinde, qyzmettik kabinetinde ustaldy. Aiyptalýshynyń kinási kýágerlerdiń jaýaptarymen, jasyryn tergeý jumystary nátijelerimen, bolǵan oqiǵanyń beinejazbalarymen jáne is boiynsha alynǵan aiǵaq zattarmen dáleldendi. Sot barysynda qylmystyq jaýapkershilikti jeńildetetin mán-jailar bolǵan joq», - delingen aqparatta.
Sot úkimimen Aiagóz qalasynyń burynǵy ákimi memlekettik qyzmette jumys isteý quqyǵyn ómir boiyna joǵaltyp, 4 jyl 5 ai merzimge bas bostandyǵynan aiyryldy.
Úkim áli zańdy kúshine engen joq.
