Eldegi iri kásiporyndar men biznes qaýymdastyqtary kópbalaly qyzmetkerlerin baspanamen qamtý úshin 38 mlrd teńgeden astam qarajat jumsaýǵa daiyn, dep habarlaidy QazAqparat tilshisi.
Elordada ótip jatqan Otbasylar forýmynda sóz alǵan QR Eńbek jáne halyqty áleýmettik qorǵaý ministriniń orynbasary Erjan Jylqybaev osyndai málimet keltirdi.
«Memleket tarapynan áleýmettik kómektiń 39 túri kórsetiledi. Sol úshin jyl saiyn 3,3 trln teńge, iaǵni biýdjettiń shyǵys bóliginiń 27 paiyzy bólinedi. Ana men balany qoldaýdyń áleýmettik baǵyty birneshe deńgeide júzege asyp jatyr. Kópbalaly analarǵa aqshalai kómekten bólek jeńildikterdiń túr-túri qarastyrylǵan. Zeinetaqyǵa erterek shyǵý, salyq jeńildikteri, turǵyn úi kezeginde basymdyq berý máseleleri qarastylyp keledi», - dedi ministrlik ókili.
Onyń aitýynsha, atalmysh sanat úshin 2025 jylǵa deiin 40 myń jaldamaly páter salynbaq. 56 myń kópbalaly otbasynyń eki paiyzdyq ipoteka boiynsha baspana alýǵa múmkindigi bar.
«Ministrlik janynan qurylǵan jumys tobymen birge «Baqytty bala», «Baqytty ana», «Baqytty otbasy», «Baqytty el» baǵdarlamalar kesheni ázirlenip, engizildi. Eldegi iri kásiporyndarmen, biznes qaýymdastyqtarmen memorandýmǵa otyrdyq. Sonyń aiasynda atalmysh uiymdar kópbalaly qyzmetkerlerin baspanamen qamtýǵa atsalysatyn bolady. Qazirdiń ózinde bul maqsatqa 38 mlrd teńgeden astam qarajat bólinip otyr», - dedi vitse-ministr.
