Iri qalalardaǵy halyqtyń sailaýǵa qatysý kórsetkishi nelikten tómenirek boldy? Bul suraq tóńireginde jýrnalist ári saiasi sholýshy Nikita Shatalov pikirin bildirdi, dep habarlaidy QazAqparat.
Qoǵam qairatkeri Murat Ábenov sailaýdyń aldyn ala qorytyndysy boiynsha sarapshylar forýmyn ótkizip jatyr. Jiynda Nikita Shatalov osy suraq qoiylǵan bolatyn.
«Úgit-nasihat jumystary barysynda popýlizm óte kóp boldy. Bir jaǵynan onyń da teris jaǵyn kórip otyrmyz. Biz Qazaqstannyń iri úsh qalasynda, Almaty, Nur-Sultan men Shymkentte halyqtyń sailaýǵa az kelgenin kórdik. Bul qaladaǵy orta klastyń mobilizatsiiasyn bildirse kerek. Iaǵni ondaǵy azamattardyń kóbi bul sailaýǵa asa qulyq tanyta qoimaidy. Máselen, Qazaqstan halyq partiiasy shyǵyp, «biz nesielik amnistiiany qoldaimyz» dese, sol orta klas «tura turyńyzdar, biz salyq tólep jatyrmyz ǵoi, bizdiń esebimizden bireýdiń nesiesin ótemeksizder me?» dep shek qoiady. Al «Aq jol» partiiasy Alash partiiasynyń ideiasyn tiriltemiz dese, sol orta klas «bizde ózimizdiń biregeilimigiz qalyptasyp qaldy, sondyqtan kún tártibimiz basqa» deýi múmkin. Kóbinese sol orta klastyń biraz ókilin sailaýǵa ákelgen - Nur Otan. Sebebi, bul partiia asa bir shuǵyl burylyssyz kele jatyr. Dese de atalmysh partiiaǵa orta klastyń tolyq simpatiiasy boldy dep taǵy aita almaimyz», - deidi Nikita Shatalov.
Eske sala ketsek QR Parlamenti Májilisi men máslihat depýtattaryn sailaýshylar tizimine engizilgen sailaýshylardyń jalpy sanynyń 63,3 paiyzy biýlletenderi alynǵany keshe habarlanǵan edi. Ol boiynsha Nur-Sultan qalasynda halyqtyń 45,1 paiyzy, Almatyda 30,3 paiyzy, Shymkent qalasynda 56,5 paiyzy sailaýǵa kelip, daýys bergeni belgili bolǵan.
Al búgin QR Ortalyq sailaý komissiiasy 10 qańtar kúni ótken QR Parlamenti Májilisi depýtattaryn sailaýda saiasi partiialar jinaǵan daýystardyń aldyn ala qorytyndysyn jariia etken bolatyn. Ortalyq sailaý komissiiasynyń hatshysy Sábila Mustafinanyń dereginshe, «Aýyl» halyqtyq-demokratiialyq patriottyq partiiasy 5,29, «Nur Otan» partiiasy 71,09%, «ADAL» saiasi partiiasy 3,57, Qazaqstannyń «Aq jol» demokratiialyq partiiasy 10,95 jáne «Qazaqstannyń Halyq partiiasy 9,10 paiyz daýys jinady.
