Túrkistanǵa Iran Islam Respýblikasynyń Qazaqstandaǵy Tótenshe jáne ókiletti elshisi Madjid Samadzade Saber jumys saparymen keldi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Aziiadaǵy iri memlekettiń ókilimen Túrkistan oblysy ákiminiń mindetin atqarýshy Arman Sabitov kezdesip, ekonomikalyq jáne mádeni bailanystardy nyǵaitý jóninde pikir almasty. Aldymen elshige Túrkistan óńiriniń investitsiialyq áleýeti, ekonomikalyq kórsetkishteri men múmkindikteri tanystyryldy.
«Búgingi kezdesý Qazaqstan men Iran arasyndaǵy bailanysty odan saiyn nyǵaitady dep senemin. 2018 jyly 18 maýsymda Túrkistan oblysy quryldy. Túrkistan qalasynyń oblys ortalyǵy atanýy shahardyń damýyna, investitsiia tartýyna serpin berdi. Ótken jyly oblysqa tartylǵan investitsiia kólemi 1,5 mlrd. AQSh dollaryn qurady. Al jalpy oblys qurylǵaly beri investitsiia kólemi 5 mlrd. AQSh dollaryna jetti. Óńirimiz indýstrialdy-agrarly aimaqtar qataryna kiredi. Azyq-túlik, aýyl sharýashylyǵy ónimderin shyǵarýda oblys elimiz boiynsha ekinshi orynda tur. Ýran qory boiynsha – birinshi orynda. Týrizmdi negizgi tabys ákelýshi salaǵa ainaldyrý baǵytynda jumys júrip jatyr. Oblysqa 1,5 mln. saiahatshy keldi, óńirge kelýshiler sanyn 5 millionǵa jetkizýdi josparlap otyrmyz. Irandyq investorlarmen, kásipkerlermen birlese jumys atqarýǵa, olarǵa múmkindikter usynyp, jańa jobalardy júzege asyrýǵa daiynbyz», – degen Arman Sabitov Iranda turatyn iasaýitanýshy ǵalymdardy Qoja Ahmet Iasaýidi zertteý baǵytynda Túrkistanda ótetin halyqaralyq ǵylymi konferentsiiaǵa qatysýǵa shaqyrdy.
Óz kezeginde Iran elshisi jýyrda QR Prezidenti Qasym-Jomart Toqaevtyń Iranǵa sapary barysynda 21 mańyzdy qujatqa qol qoiylǵanyn, eki memleket arasynda bailanys jańa satyǵa kóterilgenin atap ótti. Túrkistan qalasyndaǵy zamanaýi qurylystarǵa joǵary baǵasyn berip, osy óńirmen bailanysty kúsheitýge múddeli ekenin aitty.
«Túrkistan qalasyna kesh túse kelsem de, shahardyń biraz bóligin aralap úlgerdim. Buǵan deiin Qazaqstannyń birneshe qalasynda bolǵam. Túrkistannyń ózindik ereksheligi bar eken. Iran men Qazaqstan ózara taýar ainalymyn 3 mlrd. dollarǵa jetkizýdi kózdep otyr. Qazirgi tańda ol kórsetkish – 400 mln. AQSh dollary kóleminde. Qazaqstannyń birqatar óńirimen bailanys ornatylyp, jumys júrip jatyr. Endi Túrkistan oblysymen de iskerlik, ekonomikalyq, mádeni qarym-qatynasty jandandyrǵymyz keledi. Iran investorlarymen kezdestirýge, iskerlik basqosýlar uiymdastyrýǵa daiynbyz. Túrkistanda ótetin forýmdar, kórmeler men jiyndarǵa da delegatsiialar jiberip tura alamyz. Ásirese aýyl sharýashylyǵy, ken igerý baǵyttarynda Irannyń tájiribesi bar. Máselen biz júgerini Braziliiadan importtaimyz. Sol daqyldy Qazaqstanda, onyń ishinde Túrkistan oblysynda ósirip, satyp alýǵa bolady. Qazir Qazaqstannyń júgerisi tek ishki naryqtaryńyzǵa ǵana baǵyttalyp otyr. Jalpy Iran – úlken naryq. Ol naryqqa ený sizder úshin de tiimdi ekeni anyq. Túrkistanmen tikelei áýe reisin ornatý máselesin de talqylaýǵa bolady, týrizm salasy boiynsha da áriptestik ornatýǵa múmkindik mol», – dedi Madjid Samadzade Saber.
