Kanadanyń premer-ministri Djastin Triýdo AQSh-tan barlaý derekterin alǵanyn málimdedi. Oǵan sáikes, Ýkrainanyń Boeing 737-800 apatyna kezdeisoq tigen irandyq zymyran sebep boldy, dep habarlaidy RIA Novosti.
Buǵan deiin SVS arnasy Vashingtonnyń Ottavaǵa arnaiy barlaý derekterin bergenin habarlaǵan bolatyn. Onda irandyq zenit-zymyran kesheniniń bir dúrkin atysynan keiin Boeing 737-800 ushaǵynyń qulaǵany jaiynda aitylǵan.
"Bizge osy apatqa qatysty mańyzdy aqparatty berdi. Birneshe aqparat kózinen barlaý derekteri tústi. Oǵan sáikes, ushaqty irandyq "jer-aýa" zymyranymen atyp túsirgen. Biraq ony ádeii jasamaǵan", - dedi Triýdo arnaiy baspasóz máslihatynda.
Alaida Kanadanyń premer-ministri asyǵys sheshim jasamaýǵa úndep, jan-jaqty tergeý júrgizý qajettigin jetkizdi. Sonyń negizinde qorytyndy jasaý kerek dedi.
Irannyń azamattyq aviatsiia uiymynyń basshysy Áli Abedzade "Boeing-ti zymyranmen atyp túsirdi" degen málimdemelerdi de, ushaq qulaǵan jerde zymyran qaldyqtarynyń tabylǵany týraly aqparatty da joqqa shyǵardy.
Onyń aitýynsha, áleýmettik jelilerde "ushaq qulaǵan jerde zymyrannyń qaldyqtary tabyldy" degen taqyrypty ádeii taratyp, jurttyń nazaryn soǵan qarai buryp jatyr. Sýhoi atyndaǵy tájiribelik-konstrýktorlyq biýronyń burynǵy qyzmetkeri, aviasarapshy Vadim Lýkashevich te zymyran qaldyqtarynyń ushaq qulaǵan jerde jatpaitynyn aityp otyr.
"Ushaqqa zymyran tise, onyń qaldyqtary ushaq qulaǵan jerden birneshe shaqyrym shalǵai jerde jatýy tiis", - deidi ol.
Al Irannyń syrtqy ister ministrligi Kanadadan jáne basqa elderden áýe apatyna qatysty aqparatpen bólisýdi surady. Ministrliktiń resmi ókili Abbas Mýsavidiń aitýynsha, apatty tergeý sharalaryna Ýkraina men Boeing kompaniiasynyń sarapshylary shaqyryldy.
Sársenbi, 8 qańtar kúni "Ýkrainanyń halyqaralyq áýejoldary" kompaniiasyna qarasty Boeing 737-800 jolaýshylar ushaǵy Kiev baǵytynda ushqan bolatyn. Ushaq Tegerannyń áýejaiynan kóterilgen boida qulady. Resmi derekterge sáikes, 176 adamnyń barlyǵy qaza tapty. Olardyń ishinde 167 jolaýshy – Iran, Ýkraina, Kanada, Germaniia, Shvetsiia men Aýǵanstan azamattary, sondai-aq, ekipajdyń 9 múshesi bar.
Irannyń azamattyq aviatsiia uiymynyń esebine sáikes, jolaýshylar ushaǵy jerge qulamai jatyp órtengen. Al onyń ushý traektoriiasyna qaraǵanda, ekipaj áýejaiǵa qarai qaita burylǵan, alaida shtattan tys jaǵdai jaiynda habar bermegen. Al buqaralyq aqparat quraldary ushaqtyń bir qozǵaltqyshynan órt shyqqanan da jazǵan.
