Iran prezidenti Hasan Roýhani koronavirýs indetine bailanysty engizilgen shekteý sharalary 2021 jyldyń qańtar aiynyń sońyna deiin kúshinde qalady dep málimdedi.
"Osyndai jaǵdaida ómir súrip jatqanymyzǵa alty ai boldy, endi ózimizdi keminde taǵy alty aiǵa daiyndaýymyz kerek" dedi prezident. Roýhanidiń 9 tamyz kúni jariialaǵan málimdemesinde osyndai málimet aitylady.
Iran basshysynyń sózine qaraǵanda bilikte ázirge shekteý sharalaryn jumsartý josparda joq.
"Biz qalypty jaǵdai men shekteý sharalaryn saqtaý arasynda altyn ortasyn tabýymyz kerek" dedi.
Iran sońǵy eki aida koronavirýsqa bailanysty shekteýlerdi jumsartyp, sonyń saldarynan virýs juqtyrǵandar kúrt kóbeiip, kúnine 200-ge deiin adam qaitys bolǵan. Sońǵy málimet boiynsha, munda 324 myńnan adamǵa koronavirýs juqqan, 18 264 adam qaitys bolǵan. Buǵan deiin Iran úkimeti jariialaǵan málimetterge kúmán de bolǵan.
Jaqynda britandyq BBC saity anonimdi túrde jiberilgen qujattarǵa súiene otyryp, Iran úkimetiniń koronavirýstan qaitys bolǵandar sanyn birneshe esege kemitip kórsetkenin habarlaǵan edi.
Iran densaýlyq saqtaý ministrligi osyǵan deiin koronavirýs juqqandar sany men virýstan qaitys bolǵandar deregin jasyrmai habarlap otyrǵanyn aitqan.
