Iran Qazaqstanmen Eýraziialyq ekonomikalyq odaq aiasyndaǵy yntymaqtastyqqa joǵary mán beredi. Bul týraly búgin elordada Iran Syrtqy ister ministri Mohammad Djavad Zarif aitty, dep habarlaidy QazAqparat.
«Elderimiz arasyndaǵy mádeni, tarihi, saiasi, ekonomikalyq bailanystar óte jaqsy ári mańyzdy. Qazaqstannyń Syrtqy ister ministrimen eki el bailanystarynyń kókjiegine sholý jasap, mańyzdy ekijaqty, aimaqtyq jáne halyqaralyq máselelerdi talqyǵa saldyq. Biz Qazaqstannyń halyqaralyq arenada Iranǵa jáne onyń iadrolyq baǵdarlamasyna qoldaý kórsetip otyrǵany úshin úlken rizashylyǵymyzdy bildiremiz. QR Tuńǵysh Prezidenti Nursultan Nazarbaevtyń kóptegen bastamasyn, iadrolyq qarýsyz aimaq qurý bastamasyn qoldaimyz», - dedi Iran Syrtqy ister ministri QR Premer-Ministriniń orynbasary – Syrtqy ister ministri Muhtar Tileýberdimen kezdesýden keiin BAQ ókilderine arnalǵan málimdemesinde.
Sonymen qatar ol qazaqstandyq áriptesimen Aýǵanstan daǵdarysyn, sol elde turyp jatqan ulttar men ulystardyń teńdigin qamtamasyz etý máselelerin talqyǵa salǵanyn aitty.
«Eýraziialyq ekonomikalyq odaq aiasyndaǵy áriptestigimiz óte mańyzdy. Sonymen qatar Kaspii teńizin Iran men Qazaqstannyń jáne basqa da Kaspii mańy elderiniń beibit maqsatta paidalanýy qajettigin atap óttik. Kaspii mańy elderi bailanystaryn kúsheitý máselesine nazar aýdardyq. Qazaqstannyń Bander-Abbas portynda kóbirek bolý múmkindigin qoldap, oǵan jaǵdai jasap otyrmyz», - dedi ol.
