Iraktyń Nasiriia qalasynda aýrýhananyń koronavirýs juqtyrǵandardy emdeitin bólimi órtenip, keminde 52 adam qaza boldy. Mamandardyń boljamyna qaraǵanda, órttiń shyǵýyna ottegi ballonynyń jarylýy sebep bolýy múmkin.
Densaýlyq saqtaý basqarmasynyń baspasóz hatshysy Haidar az-Zamili 13 shildede tańerteń 52 adamnyń máiiti tabylǵanyn habarlady. 22 adam jaraqattanǵan.
"Izdeý jumystary jalǵasyp jatyr. Úiindi astynda qalǵandar nemese ǵimarat ishine qamalyp qalǵandar bolýy múmkin" dedi ol.
12 shildede densaýlyq saqtaý salasy mamandary órt sóndirilgenin habarlady.
Irak premer-ministri Mýstafa ál-Kazymi keńsesi taratqan habarlamada úkimet basshysynyń ministrlermen tótenshe kezdesý ótkizip, densaýlyq saqtaý jáne qorǵanys salasyndaǵy birqatar sheneýnikterdi, onyń ishinde aýrýhana bóliminiń jetekshisin qamaýǵa alýdy tapsyrǵany jazylǵan. Aqparat agenttikteriniń jazýynsha, aýrýhana palatasynda ottegi ballonynyń jarylýy órtke sebep bolýy múmkin.
Sáýir aiynda Baǵdat qalasynda koronavirýs juqtyrǵandardy emdeitin aýrýhanada ottegi ballony jarylyp, keminde 82 adam qaza bolǵan, 110 adam jaraqat alǵan.
Resmi málimet boiynsha, indet bastalǵaly beri Irakta 1,4 millionnan astam adam koronavirýs aýrýyna shaldyqqan, 17 500-den astamy qaitys bolǵan.
