Irak premer-ministri Haider ál-Abadi senbi kúni Baǵdatta sóilegen sózinde Irak áskeri Siriiamen shekarany shóleittegi aýdandarmen qosa basynan aiaǵyna deiin baqylaýyna aldy dep málimdedi.
Buǵan deiin Iraktyń barlyq iri eldi mekenderi "Islam memleketi" ekstremistik tobynan azat etilgeni týraly habarlanǵan.
Ekstremistik top osydan birneshe jyl buryn Irak territoriiasynyń úshten bir bóligine jýyǵyn birneshe iri qalasymen birge, sonyń ishinde IM "halifat astanasy" dep jariialaǵan Mosýl qalasyn da basyp alǵan bolatyn. Irak armiiasy kúrd jáne shiit qarýly jasaqtarynyń, sonymen birge AQSh bastaǵan halyqaralyq koalitsiianyń kómegimen jihadshylar kúshiniń betin qaitaryp, keiin qarsy shabýyl uiymdastyryp, el territoriiasyn IM ekstremisterinen azat etýdi bastaǵan. Mosýl qalasyn biylǵy jyldyń basynda jaýdan bosatqan.
Budan birneshe kún buryn Resei qarýly kúshteriniń bas shtaby Irakpen kórshi Siriia territoriiasynda IM toby tolyqtai kúiregeni týraly málimdegen. Alaida halyqaralyq koalitsiia basshylyǵy Siriianyń kei aýdandary áli jihadshylar baqylaýynda ekenin aitady.
