Qazaqstannyń bas memlekettik sanitar dárigeri Aijan Esmaǵambetova Býrabaidaǵy IQanat High School-dyń ashylýynda júzdegen adamnyń betperdesiz fotoǵa túsýine qatysty pikir bildirdi, dep habarlaidy Sputnik Qazaqstan.
"Biz ol jaiynda bilemiz. Sondyqtan tiisti sharalar qolǵa alynady. Búginde zańdy jáne jeke tulǵalardy ákimshilik jaýapkershilikke tartýdyń naqty tártibi bar. Osy oqiǵa da zerdelenip, zań boiynsha shara qoldanylady. Ishinde ministrdiń de bolǵanyn bilemiz", - dedi Esmaǵambetova.
Aita ketsek, áleýmettik jelide taraǵan sýrette júzdegen adamnyń dalada otyrǵanyn kórýge bolady. Basym bóligi betperdesiz. Ortada bilim jáne ǵylym ministri de bar. Biraq Ashat Aimaǵambetov betperde taǵyp otyrǵan. Al onyń janynda kásipker Aidyn Rahymbaev jáne taǵy basqa adamdar sanitarlyq normalardy saqtamaǵan.
Rahymbaev bul oqiǵaǵa qatysty túsinikteme berdi.
"Fotograf "Maskany sheship, 4 sekýnd tynys almai otyramyz, boldy, maskany taǵamyz" dep aitty. Foto osylai túsirildi, 250 kýáger bar. Ýaiymdap otyrǵandaryńyz úshin rahmet", - dep jazdy ol.
