Foto: Pexels.com
Kúni keshe Oljas Bektenov jumysshy kadrlar úshin ipotekalyq jáne jalǵa beriletin turǵyn úidiń jeńildetilgen baǵdarlamalaryn iske qosý máselelerin pysyqtaýdy tapsyrdy. Bul qandai baǵdarlama bolatyny, sharttary men iske qosylatyn ýaqyty áli belgisiz. Óz kezeginde «Otbasy bank» Qazaqstanda qarapaiym jumysshylarǵa arnalǵan jeńildetilgen ipotekalyq baǵdarlama baryn málimdedi.
Banktyń habarlaýynsha, jumysshylardy áleýmettik qoldaýǵa baǵyttalǵan «Korporativti ónim» dep atalatyn baǵdarlama bar kórinedi. Baǵdarlama aiasynda zaýyt jumysshylary, energetikter, kenshiler, metallýrgter, munaishylar men dárigerler, jalpy alǵanda 1000-ǵa jýyq adam baspanaly bolǵan.
Baǵdarlama pysyqtalyp jatqanda, Ult.kz qazirgi ipoteka naryǵynda jumys istep turǵan baǵdarlamalarǵa sholý jasady.
«NAÝRYZ»
Jańa jyldan bastap bul baǵdarlamaǵa birqatar ózgerister endi. Basty jańalyq — bastapqy jarna 20%-dan 10%-ǵa deiin tústi. Endi páter aqysynyń 10%-yn quiyp, ipoteka rásimdeý múmkindigi bar. Al ekinshi jańalyq – endi jobaǵa qatysý úshin depozitte keminde 2 mln teńge bolýy qajet. Buǵan deiingi talap boiynsha 1 mln teńge edi.
Sharttary:
- Mólsherlemesi: halyqtyń áleýmettik osal toptary úshin – 7%. Al ózge turǵyn úige muqtaj retinde esepte turǵan azamattarǵa – 9%;
- Beriletin qaryzdyń eń joǵary mólsheri: Astana, Almatyda 36 mln teńge, basqa óńirlerde 30 mln teńgege deiin;
- Bastapqy jarna: qaryz somasynyń 10%-nan bastap;
- Nesieleý merzimi: 19 jylǵa deiin.
7-20-25
1 qańtardan bastap bul baǵdarlamaǵa da jańa talaptar engizildi. Satyp alýshynyń (jubaiynyń da) Qazaqstan aýmaǵynda menshiginde sońǵy 18 aida baspana bolmaýy kerek. Biraq bul sanatqa apatty jaǵdaida turǵan, aýmaǵy 15 sharshy metrden aspaityn 1 bólmeli jataqhana siiaqty baspanalar kirmeidi.
Osy baǵdarlamamen kredit rásimdegen áskeri mamandarǵa da belgili bir deńgeide jeńildik beriledi. Iaǵni merzimdi áskeri qyzmette júrgen klient negizgi qaryzy men paiyzdaryn óteý merzimin keiinge qaldyra alady. Ondai múmkindik áskeri merzim aiaqtalǵan soń da 60 kúnge deiin saqtalady.
Sondai-aq bul baǵdarlamamen tek jańa, biraq paidalanýǵa berilgen turǵyn úi alýǵa bolatynyn eskergen jón.
Sharttary:
- Mólsherlemesi: 7%;
- Bastapqy jarna: páter qunynyń 20%-ynan bastap;
- Nesie merzimi: 25 jylǵa deiin;
- Turǵyn úidiń maksimaldy quny: Astana, Almaty jáne qala mańyndaǵy aýdandar, Aqtaý, Atyraý, Shymkent — 25 mln teńge; Qaraǵandy, Túrkistan — 20 mln; basqa aimaqtar — 15 mln.
«UMAI»
Resmi tabysy bar jumys isteitin áielderge arnalǵan «Umai» ipotekalyq baǵdarlamasy biyl qaita iske qosyldy. Alaida baǵdarlamaǵa qatysý talaby ózgerdi. Endi kiristiń maksimaldy somasy – 900 000 teńgeden astam. Bul baǵdarlamamen 50 mln teńgege deiin qaryz alýǵa bolady. Ol qaryzdy úi alýǵa da, jóndeý jumystaryna da paidalaný múmkindigi bar. Sondai-aq zaemdar jańa úiler men qaitalama naryqtan turǵyn úi satyp alýǵa da beriledi. Sonyń ishinde baspanany úlestik qatysý sharty boiynsha da alýǵa bolady.
Sharttary:
- Mólsherlemesi: 14,4% (jyldyq tiimdi syiaqy mólsherlemesi 15,4% bastap), keiin 3,5%-5% deiin tómendeidi (JTSM 3,6% bastap);
- Beriletin qaryzdyń eń joǵary mólsheri: 30 mln teńgege deiin;
- Bastapqy jarna: 20%-dan bastap;
- Nesieleý merzimi: 6 aidan 25 jylǵa deiin.
Áleýmettik osal toptarǵa arnalǵan baǵdarlamalar
«Baqytty otbasy» baǵdarlamasy
«Baqytty otbasy» baǵdarlamasy kópbalaly jáne az qamtylǵan otbasylarǵa, múgedek balalardy tárbielep otyrǵan otbasylarǵa arnalǵan. Baǵdarlama boiynsha bastapqy jáne qaitalama naryqtan baspana satyp alýǵa nemese jeke úi salýǵa bolady.
Sharttary:
- Mólsherlemesi: jyldyq 2%.
- Bastapqy jarna: 10%-dan bastap.
- Beriletin qaryzdyń eń joǵary mólsheri: 15 mln teńgege deiin.
«Shańyraq» (5-10-20) baǵdarlamasy
«Otbasy bank» arqyly júzege asyrylatyn bul baǵdarlama memlekettik turǵyn úi kezeginde turǵan azamattarǵa arnalǵan.
Sharttary:
- Mólsherlemesi: jyldyq 5%.
- Bastapqy jarna: 10%-dan bastap.
- Nesie merzimi: 20 jylǵa deiin.
"Seriktestik baǵdarlamalar"
Qurylys kompaniialardyń derligi klientterine arnaiy «seriktestik baǵdarlamalar» aiasynda ipoteka usynady. Ádette ol ipotekalardyń jyldyq paiyzdyq mólsherlemesi naryqtaǵy ekinshi deńgeili bankter usynatyn standartty mólsherlemelerden edáýir tómen bolady. Sondyqtan qurylys kompaniiasyna úi izdep barǵan kezde bul múmkindikti qarastyryp kórgen jón.
Eger senimdiligi naryqta dáleldengen kompaniiany tańdasańyz, qurylysy jańa bastalǵan úiden áldeqaida tómen baǵada páter satyp alýǵa bolady.
Páterdi makettegi josparlaý boiynsha tańdaǵannan keiin úi qunynyń 20%-yn bastapqy jarna retinde tólep, páterdi aldyn ala «brondaý» arqyly baǵany bekitip qoiasyz. Bul tásil irgetasy endi qalanyp jatqan úidegi páterdiń qolaily baǵasyn saqtap qalýǵa múmkindik beredi. Keiin qurylys kompaniiasy usynǵan seriktestik baǵdarlamalar aiasyndaǵy bankterdiń paiyzdyq mólsherlemelerin salystyra otyryp, eń tiimdi ipotekany tańdaýyńyzǵa bolady.
