2021 jyldyń 8 aiynda ipoteka boiynsha 1,2 trln teńgeniń 97,2 myńnan astam kelisimsharty resimdeldi. Bul byltyrǵydan 2 ese kóp, dep habarlaidy QazAqparat Birinshi kredit biýrosyna silteme jasap.
«2021 jyly ipotekalyq nesie berý eki esege artty. 8 ai ishinde Qazaqstanda jalpy somasy 1,2 trln teńgege jýyq 97,2 myńnan astam kelisimshart resimdeldi. Bul bir jyl burynǵyǵa qaraǵanda edáýir kóp. Berilgen kreditter sany 62%, al olardyń kólemi 2 eseden astam ósti. Qazaqstandyqtar kóbinese bir ipotekany ótei salyp, ekinshisin alady. Biyl 4,1 myńnan astam adam osyndai ipoteka rásimdegen», - delingen biýro habarlamasynda.
Sarapshylar 2021 jyldyń 8 aiyndaǵy qorytyndy boiynsha satyp alý-satý mámileleriniń sany 370 myńnan asqanyn aitady. Bul 2020 jyldyń sáikes kezeńimen salystyrǵanda 2,1 ese kóp.
«Qazaqstandyqtardyń zeinetaqy jinaqtarynyń bir bóligin paidalanýǵa múmkindigi paida bolǵany serpin bergeni anyq. 7 ai ishinde BJZQ-dan turǵyn úi jaǵdailaryn jaqsartý úshin alýshylardyń shottaryna 1,76 trln teńge aýdaryldy. Bul somanyń shamamen 70%-y turǵyn úi satyp alý kezinde tolyq esepteýge baǵyttalǵan. 10%-dan astamy ipotekalyq qaryz alý úshin paidalanylǵan», - dep jazady taldaý ortalyǵy.
Taldaýǵa súiensek, keiingi 12 aida merzimi ótken ipotekalyq nesieniń kólemi 310,5 mlrd teńgeden 216,5 mlrd teńgege deiin azaiǵan.
