Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine sot júiesin jańǵyrtý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat.
Atalǵan zań jobasy, «Qazaqstan Respýblikasynyń sot júiesi jáne sýdialarynyń mártebesi týraly» Konstitýtsiialyq zańǵa ózgerister men tolyqtyrýlar engizý týraly» Konstitýtsiialyq zań jobasyna qoldanystaǵy zańnamany sáikes keltirý maqsatynda Parlament depýtattarynyń zań shyǵarý bastamasymen ázirlendi.
«Zań jobasynyń basty maqsaty - investorlar qatysatyn daýlardyń instantsiialaryn qaita qaraý. Usynylyp otyrǵan investitsiialyq daýlardyń satylylyǵyn ózgertý máselesi Qazaqstan Respýblikasynyń Prezidenti janyndaǵy Qazaqstan Respýblikasy quqyq qorǵaý jáne sot júieleriniń reformasy boiynsha komissiiada qoldaý tapty. Osyǵan orai zań jobasy Azamattyq protsestik kodeksine, Ákimshilik rásimdik-protsestik kodeksine jáne «Qazaqstan Respýblikasynyń keibir zańnamalyq aktilerine ákimshilik rásimdik-protsestik zańnama máseleleri boiynsha ózgerister men tolyqtyrýlar engizý týraly» 2020 jylǵy 29 maýsymdaǵy Zańǵa ózgerister men tolyqtyrýlardy kózdeidi», - dedi Májilis depýtaty Qanat Mýsin.
Onyń aitýynsha, birkelki júktemeni bólý jáne biryńǵai praktikany ázirleý maqsatynda atalǵan eki kodekse investordyń qatysýymen daýlardyń instantsiialaryn qaita qarastyrý boiynsha tiisti túzetýler engizilgen. Atap aitatyn bolsaq, investorlar qatysatyn daýlardyń qaralýyn Nur-Sultan qalasynyń mamandyrylǵan aýdanaralyq ekonomikalyq sotqa beriledi.
«Atalǵan sot investitsiialyq daýlar boiynsha azamattyq isterdi, sondai-aq investordyń investitsiialyq qyzmetine bailanysty memlekettik organdardyń investorlarǵa talap qoiýlaryn qaraidy», - dedi depýtat.
Bul daýlardyń qatysýshalary:
1) Qazaqstan Respýblikasynyń aýmaǵynda kásipkerlik qyzmetti júzege asyratyn sheteldik zańdy tulǵalar (olardyń filialdary, ókildikteri);
2) Qazaqstan Respýblikasynyń zańnamasynda belgilengen tártippen sheteldiktiń qatysýymen qurylǵan, daýys beretin aktsiialarynyń (jarǵylyq kapitalǵa qatysý úlesi) elý jáne odan kóp paiyzy sheteldik investorǵa tiesili zańdy tulǵalar;
3) investitsiialardy júzege asyrýǵa memleketpen jasalǵan kelisimsharty bar investorlar.
«Zań jobasynda mamandandyrylǵan sottardyń, tolyqqandy úsh satyly sot qorǵaý júiesiniń saqtalýyn jáne Joǵarǵy sottyń kassatsiialyq is júrgizýdi júzege asyrýyn eskere otyryp, investorlardyń qatysýymen daýlardyń naqty satylylyǵyn aiqyndaý usynylady. Investorlardyń qatysýymen daýlardy qaraýdyń usynylǵan tásilin eskere otyryp, zań jobasyn qabyldaý elimizdiń ulttyq investitsiialyq klimatyna oń áser etetini belgili.
Sonymen qatar, osy jyldyń 1 shildesinen bastap jańa ákimshilik sottardyń qurylýyna jáne jumys isteýine bailanysty zań jobasymen Ákimshilik rásimdik-protsestik kodeksine naqtylaýshy sipattaǵy túzetýler engiziledi», - dedi Qanat Mýsin.
Budan buryn habarlanǵandai, búgingi Májilistiń jalpy otyrysynda «Qazaqstan Respýblikasynyń sot júiesi men sýdialarynyń mártebesi týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» QR Konstitýtsiialyq zań jobasy birinshi oqylymda maquldandy.
