Energetika ministrligi «Total» kompaniiasymen Dońǵa ken orny boiynsha ónimdi bólý týraly sharttyń merzimin 2024 jyldan 2039 jylǵa deiin uzartty, dep habarlaidy QazAqparat.
Vedomstvo basshysy Maǵzum Myrzaǵaliev Úkimet otyrysynda osylai dep málimdedi.
«Mańǵystaý oblysynyń áleýmettik-ekonomikalyq damýynyń 2021 – 2025 jyldarǵa arnalǵan keshendi jospary boiynsha ministrlik birqatar is-sharalardy iske asyrady. Birinshiden, ministrlik «Total» kompaniiasymen Dońǵa ken orny boiynsha ónimdi bólý týraly sharttyń merzimin 2024 jyldan 2039 jylǵa deiin uzartty. Esesine «Total» kompaniiasy 2021-2025 jyldary shamamen 70 mlrd teńge investitsiia quiady. Nátijesinde kompaniia munai óndirý deńgeiin 25% arttyrýdy qamtamasyz etedi», - dedi ministr.
Onyń aitýyna qaraǵanda, kelisimniń uzartylýy munai óndirisiniń kólemin qazirgi jylyna 680 myń tonnadan 860 myń tonnaǵa deiin arttyryp, qurylys kezinde 400-ge jýyq jumys ornyn qurady.
«Ekinshiden, «QazMunaiGaz» kompaniiasy Ózen, Jetibai jáne Qalamqas ken oryndaryna irgeles ýchaskelerde qosymsha geologiialyq barlaý jumysyn júrgizedi. Osylaisha, Bekturly, Shyǵys jáne Ózen-Qaramandybas ýchaskelerinde 26 mlrd teńge somasyna geologiialyq barlaý jumysyn júrgizý josparlanǵan», - dedi Maǵzum Myrzaǵaliev.
