QR Premer-Ministri Asqar Maminniń tóraǵalyǵymen ótken Investitsiialyq shtab otyrysynda 2021 jyldyń I toqsanyndaǵy investitsiialardy tartý boiynsha atqarylǵan jumystyń qorytyndy kórsetkishteri qaraldy, dep habarlaidy "Ult aqparat" primeminister.kz-ge silteme jasap.
Ulttyq ekonomika ministri Áset Erǵaliev 2021 jyldyń I toqsanynda negizgi kapitalǵa salynǵan investitsiialar kólemi 9,6%-ǵa qysqarǵanyn aitty. Taý-ken óndirisi ónerkásibin esepke almaǵanda, negizgi kapitalǵa salynǵan investitsiialar kólemi 34% deńgeiinde ósim kórsetti.
Negizgi kapitalǵa salynǵan investitsiialar boiynsha oń ósim qarqynyna 15 óńirde jáne respýblikalyq mańyzy bar qalalarda qol jetkizildi. Kósh bastaýshy óńirler — Túrkistan (67,4%), Jambyl (32,9%), Qostanai (23,3%), Qaraǵandy (22,8%), Soltústik Qazaqstan (20,6%) oblystary, sondai-aq Shymkent (45,8%) jáne Almaty (34,5%) qalalary boldy. Batys Qazaqstan (-48,7%) jáne Atyraý (-39,8%) oblystarynda artta qalýshylyq baiqalady.
«Kazakh Invest» UK» AQ basqarma tóraǵasy Meiirjan Iýsýpov AÓK, farmatsevtika, himiia jáne metallýrgiia ónerkásibi sekildi salalarda $4,2 mlrd astam somaǵa pysyqtaý deńgeii joǵary 12 jobany daiyndaý barysy týraly baiandady.
2021 jyldan bastap 2025 jylǵa deiingi kezeńde jalpy investitsiia somasy 45,5 trln teńge ($100 mlrd) bolatyn 2500-den astam jobany iske asyrý kózdelgen. Atalǵan jobalardy iske asyrý 2025 jylǵa qarai negizgi kapitalǵa salynatyn investitsiialar boiynsha JIÓ 30% deńgeiinde nysanaly indikatorǵa qol jetkizýge múmkindik beredi.
Investitsiialar tartý jumystary týraly tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, Túrkistan oblysynyń ákimi Ómirzaq Shókeev jáne Soltústik Qazaqstan oblysynyń ákimi Qumar Aqsaqalov baiandady.
Tsifrlyq damý, innovatsiialar jáne aeroǵarysh ónerkásibi ministri B. Mýsin 2021-2025 jyldarǵa TsDIAÓM bailanys jáne telekommýnikatsiia, tsifrlyq mainingti damytý, aeroǵarysh ónerkásibi, AT-salasy, elektrondyq ónerkásip salalarynda jalpy somasy 1,5 trln teńge bolatyn 170 jobany iske asyrýdy maqsat etip otyrǵanyn atap ótti. Biyl 265 mlrd teńge somasyna 64 jobany iske asyrý josparlanyp otyr.
Túrkistan oblysynyń ákimi Ó. Shókeev 2021-2025 jyldarǵa ákimdik AÓK, jańartylatyn energetika, týrizm, himiia ónerkásibi jáne t. b. salalarda 27 myń jumys ornyn qura otyryp, jalpy somasy 2,6 trln teńge bolatyn 181 investitsiialyq jobadan turatyn pýl qurǵanyn baiandady. Biyl 256 mlrd teńge somasyna 81 jobany iske asyrý kózdelgen.
Soltústik Qazaqstan oblysynyń ákimi Q. Aqsaqalov aldaǵy 5 jylda ákimdik AÓK, mashina jasaý, tsifrlandyrý, farmatsevtika, densaýlyq saqtaý, TMK jáne t. b. salalarda 1,5 trln teńge somasyna 66 jobadan turatyn pýl qurǵanyn atap ótti.
«Ishki jáne syrtqy investitsiialardy tartý jumysyn barlyq memlekettik organdar, óńirlerdiń ákimdikteri men kvazimemlekettik sektor sýbektileri júieli negizde júrgizýi tiis», - dedi A. Mamin.
