Investitsiialyq ombýdsmen mindetteri Premer-Ministrge júkteldi

Qazaqstanda investitsiialyq ombýdsmen mindetteri Úkimet basshysy Asqar Maminge júkteldi, dep habarlaidy QazAqparat tilshisi.

«Investitsiialar jónindegi ombýdsmen bolyp Qazaqstannyń Premer-Ministri taǵaiyndalǵanyn atap ótý mańyzdy. Elimizde aldaǵy ýaqytta «Astana» HQO investitsiialardy tartý jáne Qazaqstannyń investitsiialyq imidjin ilgeriletý jónindegi jumysty úilestirý boiynsha biryńǵai ortalyq bolyp aiqyndalady. Ol Óńirlik investitsiialyq hab bolady. Sol siiaqty onda investorlarǵa «bir tereze» qaǵidaty boiynsha qyzmet kórsetý jáne investitsiialyq jobalardyń biryńǵai pýlyn qalyptastyrý ortalyqtandyrylady. «Kazakh Invest» Aktsionerlik qoǵamy «Astana» Halyqaralyq qarjy ortalyǵynyń ákimshiligine senimgerlik basqarýǵa beriledi. Jobalardy qalyptastyrý men súiemeldeýdiń biryńǵai aqparattyq júiesi qurylady. Zamanaýi tsifrlyq tehnologiialardy engizýmen viza jáne kóshi-qon rejimin odan ári yryqtandyrý boiynsha sharalar qabyldanatyn bolady», - dedi Premer-Ministrdiń birinshi orynbasary-Qarjy ministri Álihan Smaiylov.

Birinshi Vitse-premer Nur-Sultan qalasy men halyqaralyq qarjy ortalyqtary arasynda tikelei áýe qatynastarynyń geografiiasy keńeitiletinin aityp ótti.

«Joǵarǵy sotpen jáne Bas prokýratýramen birlesip, investitsiialyq klimatty odan ári jaqsartý, investorlardyń quqyqtaryn qorǵaý jáne zańnyń ústemdigin qamtamasyz etý jóninde usynystar ázirlenedi. Jańa arhitektýra sheńberinde jobalardy jyljytý bylaisha bolady: birinshi kezeńde - Óńirlik investitsiialyq habqa barlyq áleýetti investitsiialyq jobalar ortalyqtandyrylyp jinalady. Ekinshi kezeńde - «Astana» Halyqaralyq qarjy ortalyǵynan sarapshylar men konsýltanttardy tarta otyryp, «Kazakh Invest» bazasyndaǵy jobalardy óńdeý jáne taldaý jasalady. Jobalar sheteldik investorlar úshin túsinikti formattarǵa keltiriledi. Úshinshi kezeń - «Astana» Halyqaralyq qarjy ortalyǵynyń qoldaǵy bar múmkindikteri men Syrtqy ister ministrliginiń infraqurylymyn paidalana otyryp, qoldanysqa daiyn jobalardy jyljytý. Tórtinshi kezeń - «Astana» Halyqaralyq qarjy ortalyǵynyń zańdyq infraqurylymyn paidalana otyryp, investitsiialyq hab bazasynda kelisimsharttar jasasý», - deidi ol.