QR Premer-Ministri Asqar Maminniń tóraǵalymen ótken Investitsiialyq ahýaldy jaqsartý jónindegi keńes (IAJK) otyrysynda salyq saiasaty máseleleri jáne onyń Qazaqstandaǵy investitsiialyq ahýalǵa yqpaly qaraldy, dep habarlaidy "Ult aqparat" Úkimet basshysynyń baspasóz qyzmetine silteme jasap.
Salyq salýdyń sheteldik tájiribesi men onyń qolaily iskerlik ahýaldy qalyptastyrýdaǵy jáne ekonomikalyq básekelestikti damytýdaǵy róli, sondai-aq Qazaqstanda salyqtyq ákimshilendirý men fiskaldy saiasattyń ilgerlemeli ádisterin iske asyrý boiynsha usynystar týraly Qazaqstanda akkredittelgen Ulybritaniia elshisi M. Gifford, Kanada elshisi N. Brýsso, Eýropalyq odaq elshisi Sven-Olov Karlsson, AQSh elshiliginiń isterindegi ýaqytsha senimdi ókil T. Liýng, sondai-aq investitsiialyq qaýymdastyqtyń – EY, Deloitte, PwC, Heidelberg Cement kompaniialarynyń ókilderi baiandady.
Qazaqstanda júrgizilip jatqan salyqtyq ákimshilendirý reformasy týraly QR ulttyq ekonomika ministri R. Dálenov, qarjy birinshi vitse-ministri B. Sholpanqulov sóiledi.
«2019 jyldyń qorytyndysy boiynsha Qazaqstannyń JIÓ 4,5%-ǵa ósti. Ósim negizinen shikizattyq emes salalar – qurylys (12,9%), saýda (7,6%), kólik (5,1%), óńdeý ónerkásibi (4,4%) esebinen qamtamasyz etildi. Elge tartylǵan tikelei sheteldik investitsiialar kólemi $25 mlrd deiin ulǵaidy. Halyqtyń naqty tabysy 5,5%-ǵa artty, infliatsiia josparly dálizde saqtalyp, 5,4% qurady. Álemdik ekonomikanyń kezeńdik báseńdeýi men Qytaidaǵy ahýalǵa bailanysty táýekelder jaǵdaiynda belgilengen damý trendin saqtaý men nyǵaitý bizdiń basymdyǵymyz bolyp qala beredi», — dedi A. Mamin.
Premer-Ministr ekonomikalyq ósimdi qamtamasyz etýdegi, iskerlik ahýaldy jaqsartýdaǵy, halyqtyń jumyspen qamtylýyn arttyrýdaǵy jáne investitsiia tartýdaǵy tiimdiligin arttyrý maqsatynda QR-da júrgizilip jatqan salyq júiesiniń reformasy týraly aityp berdi.
«Biz Qazaqstannyń halyqaralyq pozitsiiasyn naqty ári aiqyn salyq júiesi bar, senimdi jáne boljamdy investitsiialyq baǵyt retinde odan ári nyǵaitý týraly usynystardyń tiimdi oryndalýyn qamtamasyz etemiz», — dep túiindedi A. Mamin.
