Foto: © Sputnik / Murad Orujov
Almaty turǵyny burynǵy jigitiniń tarapynan psihologiialyq zorlyq-zombylyqqa ushyraǵanyn aitty. Áiel er adam ony jynystyq jaqyndyq kezinde jasyryn túrde videoǵa túsirgen bolýy múmkin ekenin jetkizdi, al ajyrasqannan keiin bul kadrlardy jaqyndaryna, áriptesterine jáne tanystaryna qorqytyp, jibere bastaǵan. Bul týraly Dinara esimdi turǵyn aityp berdi, - dep habarlaidy Tengrinews.kz saity.
Onyń aitýynsha, 2021 jylǵy qarashadan bastap búgingi kúnge deiin ol únemi psihologiialyq zorlyq-zombylyqqa ushyrap kelgen.
"WhatsApp-ta top quryldy, ishinde meniń iskerlik tanystarymnan kem degende 200 adam boldy. Chatqa intim sipattaǵy video men sýretter jiberildi. 2022 jylǵy qazanda mektep basshylarynyń, sondai-aq, meniń balalarymdy oqytatyn muǵalimder bar úlken top quryldy. Bul chatqa burynǵy kúieýimniń týystary, dostarym, balalar, týystarym kirdi. Meniń oiymsha, bul meniń balalarymnyń minez-qulqyna jáne olardyń psihikasyna áser etti. Mektep meńgerýshisi de, muǵalimder de mundai sumdyqtan shoshyp ketti", - dep eske aldy ol.
Alaida, Dinaranyń aitýynsha, burynǵy súiiktisi munymen toqtamaǵan.
"Biyl 30 qańtarda jeke aqparattar, sondai-aq, pornografiialyq sipattaǵy uiatsyz materialdarmen "men ózimdi jek kóremin" degen top quryldy. Bul týraly 14 jastaǵy jasóspirim qyzym aitty. Ony da qosqan. 2022 jylǵy jeltoqsanda meniń atymnan dostarym men týystarymdy qosyp, tirkelmegen nómirden pornografiialyq sipattaǵy materialdary bar chat quryldy. Bul týraly chatqa qosylǵan dostarym aitty", - dedi áiel.
Onyń aitýynsha, WhatsApp chattary ártúrli tirkelmegen nómirlerden ashylǵan. Jábirlenýshi munyń bárin oǵan qaýip tóndirip júrgen burynǵy súiiktisi jasaǵanyna tolyq senimdi. Ol jaqyn qarym-qatynasta bolǵan kezde er adam páterin jóndeýge kómekteskenin aitady. Alaida qarym-qatynas aiaqtalǵan kezde er adam odan 9,5 million teńge talap etken.
"Mundai chattar ai saiyn turaqty qurylyp otyrady. Barlyq zańsyz áreketti bilemin, burynǵy jigitim E.R.S. 2021 jylǵy qarashadan bastap meni qorqytyp, páterdi jóndeýge jumsalǵan aqshany talap etti", - dedi ol.
"Ózimniń, balalardyń telefon nómirin ózgertýge tyrysqanymmen eshteńe shyqpady, óitkeni ol maǵan telefondy ońai buzatyn hakeri bar ekenin aitty. Ol aqsha talap ete bergen soń jyljymaityn múlikti satýǵa jáne turǵylyqty jerimdi ózgertýge májbúr boldym! 2022 jylǵy qańtarda onyń shotyna 1 000 000 teńge jiberdim, biraq ol odan da kóp, áldeqaida kóp talap etti! 2022 jylǵy 8 shildede men oǵan qýdalaýdy toqtatady degen úmitpen 6 600 000 teńge shotqa jiberdim, sodan keiin ol teńge qunsyzdanǵanyn eskerte otyryp, odan da kóp qaryz ekenimdi aitty", - dedi jábirlenýshi.
Dinaranyń sózinshe, quqyq qorǵaý organdaryna birneshe ret júgingeninen eshqandai nátije bolmaǵan. Onyń aitýynsha, 47 jastaǵy burynǵy súiiktisi Ózbekstannyń týmasy jáne iri bankterdiń birinde jumys isteidi.
Almaty Politsiia departamenti ókili bul ispen ainalysyp jatqandaryn habarlady.
"Bostandyq aýdanynyń politsiia qyzmetkerleri jaǵdaidy anyqtap jatyr. QR zańnamasyna sáikes sharalar qabyldanyp, er adamnyń is-áreketine baǵa beriledi", - dedi Almaty Politsiia departamentiniń resmi ókili Saltanat Ázirbek.
