Ishki ister ministrligi vaktsina pasporty men PTR-testileý anyqtamasyn qoldan jasaýdy usynǵan 35 habarlamany buǵattaýǵa joldady, dep habarlaidy QazAqparat.
Bul týraly Ishki ister ministrliginiń baspasóz ókili Shuǵyla Turlybek vedmostvonyń aqparat alańynda aitty.
«Kei azamattar qazirgi jaǵdaidy paidalanyp, tabys tabýǵa tyrysyp júr. Olar PTR testileý qorytyndysy men vaktsina pasportyn qoldan jasaidy. Osylaisha virýstyń taralýyna sebepker bolady. Jyl basynan beri ishki ister organdardy PTR testileý qorytyndysy men vaktsina pasportyn qoldan jasaýdyń, sondai-aq, olardy paidalanýdyń 30 jaǵdaiyn tirkedi», - dedi Shuǵyla Turlybek.
Ministrlik ókili Almaty qalasynda qajylyqqa baratyn adamdarǵa jalǵan vaktsina pasportyn rásimdegen týristik kompaniia týraly málimet berdi.
«Mysaly, Almaty qalasynda qajylardyń Saýd Arabiiasyna ketýin rásimdeý kezinde vaktsina pasportyn jappai daiyndaýǵa qatysy bar týristik kompaniia anyqtaldy. Sotqa deiingi tergeý júrip jatyr. Tintý kezinde uiymdastyrý tehnikasy, mórler jáne blank ónimderi alyndy, sot saraptamalary taǵaiyndaldy. Jalǵan qujat daiyndaǵany úshin 4 jylǵa deiin bas bostandyǵynan aiyrý, al ony paidalanǵany úshin 40 táýlikke deiin qamaýǵa alý túrindegi qylmystyq jaýapkershilik qarastyrylǵan», - deidi vedomstvonyń baspasóz ókili.
Onyń aitýynsha, saqshylar internettegi PTR-test anyqtamasy men vaktsina pasportyn usynatyn habarlamalardy jiti baqylaýǵa alǵan kórinedi.
«Internet jelisinde monitoring júrgizý kezinde biz derekter bazasynda resmi tirkelmegen anyqtamalardy nemese vaktsina pasporttaryn daiyndaý týraly jalǵan usynystardy anyqtaimyz. Biz qazirdiń ózinde ýákiletti organǵa buǵattaýǵa jatatyn osyndai 35 habarlandyrýdy anyqtap, joldadyq. Ishki ister ministrligi osy indetpen bailanysty barlyq qylmystyq kórinisterge erekshe nazar aýdarady», - ded Shuǵyla Turlybek.
