Búgin QR Premer-Ministriniń orynbasary Eraly Toǵjanovtyń tóraǵalyǵymen oiyn biznesi men lotereia qyzmetin retteý máseleleri jóninde keńes ótti, dep habarlaidy "Ult aqparat" primeminister.kz saityna silteme jasap.
Mádeniet jáne sport vitse-ministri Erjan Erkinbaev Mólsherlemelerdi esepke alý ortalyǵyn qurý, onlain-kazinolarǵa qarsy is-qimyl boiynsha zańnamalyq túzetýlerdi qabyldaý, oiynǵa arnalǵan saittardy buǵattaý, lotereia biznesin retteý máseleleri boiynsha tapsyrmalardyń oryndalý barysyn baiandady.
Vitse-Premer onlain-kazino saittarynyń qoljetimdiligi men keńinen taralýy halyqtyń qumar oiyndarǵa tartylýynyń negizgi sebepteri ekenin atap ótti. Memlekettik organdarda mundai saittardyń sany, qumar oiyndarǵa táýeldi adamdar jáne azamattardyń onlain kazinoǵa jumsaǵan qarajatynyń kólemi týraly derekter joq.
Toǵjanov Mólsherlemelerdi esepke alý ortalyǵynyń Mádeniet jáne sport ministrligi bazasynda qurylýy tiis ekenin aitty.
Keńes qorytyndysy boiynsha Eraly Toǵjanov memlekettik organdarǵa birqatar naqty tapsyrma berdi.
Atap aitqanda:
- zańsyz oiyn biznesine qarsy is-qimyl jáne azamattardyń qumar oiyndarǵa tartylý deńgeiin tómendetý boiynsha birlesken is-qimyl josparyn ázirleý;
- qumar oiyndardyń ziiany týraly áleýmettik rolikter jasaý jáne nasihattaý;
- qoǵam ókilderin tarta otyryp, zańsyz oiyn oryndaryn anyqtaý boiynsha reidter júrgizý;
- internet-kazinony uiymdastyrýshy tulǵalardyń tizimin belgileý;
- bankter men tólem júielerine osy tulǵalardyń qarjy operatsiialaryn júrgizýge tyiym salý;
- nesie kartalarynyń kómegimen kazinolarda, oiyn avtomattary zaldarynda, býkmekerlik keńselerde jáne totalizatorlarda tólemderdi júzege asyrýǵa nemese shottardy tolyqtyrýǵa tyiym salý;
- internet-kazinony uiymdastyrǵany úshin jaýapkershilik belgileý;
- qumar oiyndarǵa táýeldi azamattardy, olardyń ishinde balalardy anyqtaý jáne ońaltý júiesin ázirleý.
Aita keteiik, keńeske ýákiletti memlekettik organdar men Ulttyq bank ókilderi qatysty.
