Internet-alaiaqtyqtyń basym bóligi transshekaralyq sipatqa ie. Bul týraly QR IIM Qylmystyq politsiia departamentiniń kiberqylmysqa qarsy kúres ortalyǵy bastyǵynyń orynbasary Rústem Dúisetaev aitty, dep habarlaidy QazAqparat tilshisi.
«Internet arqyly jasalatyn alaiaqtyqqa qarsy kúres turaqty túrde júrgizilýde. Qolǵa alynǵan sharalardyń arqasynda biyl osyndai myńǵa tarta qylmys ashyldy. Osy qylmystarǵa qatysty 388 adam ustaldy. Olardyń 160-y eki nemese odan da kóp qylmysqa qatysy bar degen kúdikke ilingen. Internet-alaiaqtyqtyń basym bóligi transshekaralyq sipatqa ie. Internettegi saýda-sattyq barysynda taraptardyń bir-birimen kezdespeitini belgili. Sol sebepti, qylmysker bir óńirde otyryp alyp, ekinshi óńirde qylmysyn jasai alady», - deidi QR IIM ókili vedomstvoda ótken baspasóz máslihatynda.
Rústem Dúisetaev óz sózine internettegi alaiaqtyqtyń birneshe túri baryn aitady. Bir jaǵdaida qylmyskerler jalǵan jarnamalar arqyly azamattardy aldasa, ekinshi jaǵdaida adamdardyń jeke qujattaryn paidalana otyryp, piǵyldaryn iske asyrady.
«Internettegi alaiaqtyqtyń eń kóp kezdesetin túri – múlik nemese taýar, qyzmet týraly jarnama jariialaý arqyly jasalady. Mundai sanatta biyl 4,5 myń qylmys tirkeldi. Alaiaqtar mundai jaǵdaida klientterdi arzan baǵamen arbap aldaidy. Aldyn ala jarna nemese tolyq aqshany bank kartasyna nemese elektrondy ámiianǵa jiberýdi suraidy. Álbette, bank kartalary múlde úshinshi adamǵa tiesili bolýy múmkin», - dedi ol.
