Foto: Polisia.kz
Qazaqstan, Ýkraina jáne Chehiia politsiiasy internet-alaiaqtardyń eki transulttyq qylmystyq tobyn joidy, – dep habarlaidy «Ult aqparat» Polisia.kz-ke silteme jasap.
– Kiberqylmysqa qarsy is-qimyl sheńberinde IIM qyzmetkerleri jedel-izdestirý is-sharalaryn júrgizip, internet-alaiaqtyqqa sheteldik azamattardyń qatysy bar ekenin anyqtady. Ministrlik qyzmetkerleri qyzmettik issapar barysynda Ýkraina Ulttyq politsiiasymen jáne Chehiia politsiiasymen birlesip, internet-alaiaqtardyń eki transulttyq qylmystyq tobynyń áreketine tosqaýyl qoidy, – dedi departament bastyǵy – IIM resmi ókili Shyńǵys Alekeshev.
Zaporoje qalasynda alaiaqtardyń eki call-ortalyǵy joiyldy. Qaskúnemder ózderin bankter men quqyq qorǵaý organdarynyń qyzmetkerleri retinde tanystyryp, qazaqstandyqtarǵa qońyraý shalyp, olardyń shottarynyń derekterin alýǵa tyrysqan. 9 adam ustaldy. 17 kompiýter, 62 mobildi qurylǵy, sondai-aq 35 gramm «metadon» preparaty tárkilendi.
Odessa qalasynda úsh alaiaqtyq call-ortalyq taratyldy. Qaskóiler jalǵan investitsiialyq kompaniialarǵa qarjy salý syltaýymen internet-alaiaqtyq jasaǵan. Munda 23 adam ustaldy. 9 kúdikti ýaqytsha ustaý izoliatoryna qamaldy. 8 avtokólik, 58 noýtbýk, 52 smartfon, 100-den astam sim-karta, sondai-aq 200 myń AQSh dollarynan astam somaǵa tsifrlyq aktivter tárkilendi.
– Qazirgi ýaqytta tergeý jáne jedel-izdestirý amaldary jalǵasýda, – dedi Shyńǵys Alekeshev.
