Qurlyq áskerleri Áskeri institýty bitirýshi kýrsynyń kýrsanttary ózderiniń mamandyqtary boiynsha dalalyq praktikalyq sabaqtardan ótti, dep habarlaidy QR Qorǵanys ministrliginiń baspasóz qyzmeti.
Bolashaq ofitserler is júzinde alǵan teoriialyq bilimderin pysyqtap, áskeri tehnikany basqara alý sheberlikterin pash etti jáne sý bógetterin urys mashinasymen eńserýdiń barlyq múmkindikterin zerdeledi.
Qurama ekipajdar quramynda olar jaiaý áskerdiń jaýyngerlik mashinalary men T-72 tankterinde 100 shaqyrymdyq marsh jasady. Arnaiy ol úshin áskeri institýttyń oqý-jattyǵý ortalyǵynda kórsetilim sabaqtary uiymdastyryldy.
Kýrsanttar jaýyngerlik mashinalardy júrgizý, kúrdeli jaǵdaida manevrleý, ártúrli kedergilerdi eńserýde tabandylyq pen batyldyqty pash etti.
«Marshty uiymdastyrý men ótkizýdi zerdeleý kezeń-kezeńimen ótedi. Birinshi kýrsta kýrsanttar bólimshe komandiriniń jumysy deńgeiinde, ekinshi jáne úshinshi kezeńde vzvod jáne rota komandiri deńgeiinde qajetti máselelerdi zerdeleidi. Bolashaq ofitserler 100 shaqyrymdyq marshty oqytýdyń sońǵy tórtinshi kýrsynda batalon komandiri aýqymynda ótkiziledi», - dedi Qurlyq áskerleri Áskeri institýty oqý bóliminiń bastyǵy podpolkovnik Jánibek Sarǵazin.
Praktikalyq sabaqtar oqyp-úirenýshilerdiń taktikalyq, atys jáne ádistemelik mashyǵyn arttyrýǵa yqpal etetinin, urysty uiymdastyrý men júrgizýdegi qabiletterin jetildiretinin aita ketken jón. Kýrsanttar áskerlerge qyzmet etýge joǵary deńgeidegi kásibi daiyndyqpen, ofitserler úshin qajetti bilim jáne daǵdymen attanady.
