Qazaqstanda alaiaqtar tanymal tulǵalardyń dipfeik-videolaryn paidalanyp, azamattardy jalǵan investitsiialyq jobalarǵa aqsha salýǵa tartýda. Bul týraly Bas prokýratýra habarlady, dep habarlaidy ult.kz.
Vedomstvo málimetinshe, qylmyskerler TikTok, Instagram, YouTube jáne basqa platformalarda joǵary tabys ýáde etetin jalǵan jarnamalar taratady. Sońǵy bir jarym aida el boiynsha osyndai 119 derek tirkelgen.
Solardyń biri — Taldyqorǵan turǵyny. Ol Instagram-daǵy investitsiialyq jarnamadaǵy silteme arqyly bailanys derekterin qaldyrǵan. Keiin alaiaqtardyń nusqaýymen úshinshi tulǵalardyń shottaryna 7 mln teńgeden astam aqsha aýdarǵan. Jalǵan platformada onyń aqshasy men «dividendteri» kórsetilgenimen, qarajatty sheship alýǵa múmkindik berilmegen.
Qazir bul fakt boiynsha sotqa deiingi tergeý júrip jatyr.
Bas prokýratýra azamattardy joǵary tabysqa ýáde beretin kúmándi investitsiialyq usynystarǵa senbeýge jáne beitanys adamdarǵa aqsha aýdarmaýǵa shaqyrdy.
