QR Bilim jáne ǵylym ministri Ashat Aimaǵambetov Instagram-daǵy jeke paraqshasyna kelip túsetin saýaldarǵa nelikten jaýap bermeitindigin túsindirdi, dep habarlaidy QazAqparat.
«Instagram-da meni oqyp otyratyn 100 myńnan astam halyq bar. Kúnine 400-500-ge deiin suraq kelip túsedi. Facebook paraqshama da biraz suraq túsip jatady. Oǵan qosa blogyma túsetin suraqtar bar. Sondyqtan kúnine myń suraqqa jaýap berý qiyn. Onyń ústine ol suraqtardyń kópshiligi qaitalanyp otyrady. Kópshiligi ministrliktiń saitynda jaýap berilgen máselelerdi qamtidy. Taǵy birazy júieli máseleni emes, adamnyń jeke quqyǵyna bailanysty bolyp keledi. Bilim jáne ǵylym ministrligi, jalpy ministr naqty osyndai máselemen jeke ózi ainalysatyn bolsa, onda onyń jumys isteýine qiyndyq týady», - dedi Ashat Aimaǵambetov halyqqa esep berý kezdesý barysynda atyna túsken saýalǵa orai.
Onyń atap ótýinshe, kelip túsken suraqtar jergilikti atqarýshy organdarǵa jiberilip otyrady. Olardyń tarapynan sheshim tappaǵan jaǵdaida ǵana másele ministrlikte qarastyrylady.
