Informatika pánin 1-synyptan bastap oqytý múmkindigi zerttelip jatyr. Bul týraly Májiliste bilim salasyndaǵy tsifrlandyrý taqyrybyndaǵy Úkimet saǵatynda QR Bilim jáne ǵylym ministri Erlan Saǵadiev málim etti, dep habarlaidy "Ult aqparat" QazAqparat agenttigine silteme jasap.
«Ministrlik bilim men ǵylymdy tsifrlandyrý boiynsha úsh baǵytta jumys jasap jatyr. Birinshisi - ol orta bilim júiesinde aqparattandyrýdy damytýǵa negizdelgen. Ekinshisi - bilim berý men ǵylymdy basqarý protsesterin avtomattandyrý, al úshinshisi - IT mamandardy daiarlaý. Birinshi baǵyt boiynsha EYDU elderinde kóbinese baǵdarlamalar 1-synyptan bastalady. Bizde informatika páni mektepte 5-synyptan bastalyp oqytylǵan, endi biyl 3-synyptan bastalady. Sonymen qatar, informatikany oqytýda 1-synyptan bastap engizý múmkindigi boiynsha sarapshylarmen jumys júrgizip jatyrmyz. Qazir joba jasalyp, qoǵamda talqylanatyn bolady», - dedi ministr.
Onyń sózine qaraǵanda, 3 myńnan astam mektep pen oqýshylar saraiynda robot tehnikasy boiynsha elektivtik kýrs engizildi.
«Biraq bizge robot tehnikasyn barlyq mektepterge deiin jetkizý kerek. Búgingi mindet - ol atalǵan robot tehnikasy kabinetterin quraldarmen jabdyqtaý. Ótken jyldar ishinde 5 400 pedagog, onyń ishinde 730-y robot tehnikasy boiynsha biliktilik kýrstarynan ótti. 2018 jyly taǵy 2 500 muǵalim oqytamyz, sonyń ishinde atalǵan baǵyt ta qamtylady», - dedi E. Saǵadiev.
