Infliatsiianyń 50 paiyzdan astamy azyq-túlik taýarlary baǵasynyń ósýine tiesili bolyp otyr.
Bul týraly Úkimet otyrysynda infliatsiiaǵa qarsy den qoiý sharalarynyń keshenin talqylaý kezinde Ulttyq ekonomika ministri Áset Erǵaliev málim etti, dep habarlaidy QazAqparat.
«Jahandyq pandemiia búkil álemdegi infliatsiialyq protsesterge qysym jasaityn buryn-sońdy bolmaǵan makroekonomikalyq soqqyǵa ainaldy. Logistikalyq tizbekterdiń buzylýy, suranystaǵy qurylymdyq ózgerister, ekonomikany qoldaýǵa baǵyttalǵan ekspansiialyq monetarlyq jáne fiskaldyq baǵdarlamalardy qabyldaý jáne basqa da trendterdiń áserinen búgingi kúni infliatsiianyń ósýi búkil álemde baiqaldy. Nátijesinde, halyqaralyq qarjy uiymdary 2021 jyly infliatsiianyń búkil álemde 3,9%-ǵa jedeldeýin boljaidy. Qazaqstanda biialǵy tamyzda infliatsiianyń ai saiynǵy ósýi 0,5%-dy qurady», - dedi Á. Erǵaliev.
Onyń aitýynsha, maýsymaralyq faktorlar jáne keiinge qaldyrylǵan suranys áserinen aqyly qyzmetter ári azyq-túlik emes taýar baǵalarynyń ósýiniń úlesi artty. Osynyń saldarynan, aqyly qyzmetter boiynsha baǵalardyń ósýi 0,8%, azyq - túlik emes taýarlar boiynsha - 0,6%, azyq-túlik taýarlary boiynsha 0,1% qurady.
«Jyldyq esepteýde Qazaqstanda infliatsiia 8 aidyń qorytyndysy boiynsha 8,7%-dy qurady jáne tarihi qalyptasqan qurylymǵa sáikes, onyń 50%-dan astamy azyq-túlik taýarlary baǵasynyń ósýine tiesili bolyp otyr», - dedi ministr.
