Úkimettiń aldyndaǵy kúrdeli mindettiń biri – infliatsiiany ustap turý. Bul týraly búgin Úkimet otyrysynda QR Premer-Ministri Álihan Smaiylov aitty, dep habarlaidy QazAqparat.
«Jalpy alǵanda, elimizdiń áleýmettik-ekonomikalyq damýyna shekteý sharalarynyń áserin barynsha azaita aldyq. Bul jumysty jalǵastyrýymyz kerek. Bizben kórshiles elderdiń ekonomikasyna sanktsiialardyń yqpaly kúsheie tústi. Sonymen qatar, Úkimettiń aldyndaǵy kúrdeli mindettiń biri – infliatsiiany ustap turý. Naýryz aiynyń qorytyndysy boiynsha elimizdegi jyldyq infliatsiianyń deńgeii 12 paiyzdy qurady», -dedi Úkimet basshysy.
Álihan Smaiylovtyń paiymynsha, oǵan birinshi kezekte, bizdiń saýda jasap otyrǵan seriktes elderdegi infliatsiianyń ósýi men álemdik azyq-túliktiń qymbattaýy tikelei áser etken.
«Birikken Ulttar Uiymy azyq-túlik jáne aýyl sharýashylyǵy uiymynyń málimeti boiynsha biylǵy naýryz aiyndaǵy azyq-túlik baǵasynyń álemdik indeksi 159 paiyzdyq tarmaqqa deiin ósip, sońǵy 30 jylda bolmaǵan eń joǵary deńgeige jetken. Álemde negizinen dándi daqyldarǵa, ósimdik maiyna, qantqa, et pen sút ónimderine baǵa ósip ketken. Bul bizdiń naryqqa da tikelei áser etip otyr», - dedi ol.
Osy oraida Úkimet basshysy el Prezidentiniń tapsyrmasy boiynsha 2022-2024 jyldarǵa arnalǵan infliatsiia deńgeiin baqylaý jáne tómendetý boiynsha keshendi sharalar iske asyrylyp jatqanyn aitty.
«Infliatsiiany ustap turý úshin qajetti quraldar bar. Memlekettik organdar men ákimdikter olardy tiimdi paidalanyp, bul máseleni erekshe nazarda ustaýy tiis», - dedi Premer-Ministr.
