Qazaqstan Ulttyq Bankiniń tóraǵasy Daniiar Aqyshev 2019 jylǵa arnalǵan negizgi maqsat – infliatsiiany 4-6% dálizde ustap turý ekenin aitty, dep jazady Baq.kz agenttigi.
Qazaqstan Ulttyq Banki infliatsiialyq targetteý saiasatyn júrgizýdi jalǵastyrady. Qazaqstan Ulttyq Bankiniń 2019 jylǵa arnalǵan negizgi maqsaty – infliatsiiany 4-6% dálizde ustap turý. Bul dáliz respýblikalyq biýdjettiń negizgi áleýmettik kórsetkishterin indeksteý ólshemderin eseptegen kezde paidalanyldy.
Májilis otyrysynda Qazaqstan Ulttyq Bankiniń basshysy infliatsiialyq protsesterdi retteý úshin basym túrde aqsha-kredit saiasatynyń paiyzdyq arnasy qoldanylatynyn atap ótti. Bul Qazaqstan Ulttyq Bankiniń bazalyq mólsherlemesi negizgi qural bolyp tabylatynyn bildiredi, ol mólsherleme aqsha naryǵyndaǵy mólsherlemeler dálizin aiqyndaityn bolady. Ulttyq Bank elde qalyptasyp otyrǵan jáne kútiletin infliatsiia mólsherine, sondai-aq tólem balansynyń jai-kúiin aiqyndaityn syrtqy faktorlarǵa bailanysty mólsherleme kólemin belgileitin bolady.
«2018 jylǵy 9 aida infliatsiia 3,3% boldy. 2018 jylǵy qyrkúiekte jyldyq infliatsiia ótken jyldyń sońyndaǵy 7,1%-ben salystyrǵanda 6,1%-ǵa deiin tómendedi. Infliatsiianyń ósý táýekelderin tómendetý úshin 15 qazanda bazalyq mólsherleme 9%-dan 9,25%-ǵa deiin ulǵaityldy. Bazalyq mólsherlemeniń jańa deńgeii teńgemen aktivterge suranysty arttyrýǵa jáne qolaily aqsha-kredit talaptaryn saqtaýǵa múmkindik beredi», – dedi Daniiar Aqyshev.
Atap ótsek, Májilis otyrysynda "2019-2021 jyldarǵa arnalǵan respýblikalyq biýdjet týraly" QR Zań jobasy qaralyp jatyr.
