Qazaqstanda Hyundai kompaniiasymen birge avtokólik shyǵarý jobasy qolǵa alyndy.
Bul týraly QR Indýstriia jáne infraqurylymdyq damý ministri Roman Skliar aitty, dep habarlaidy QazAqparat tilshisi.
«Mashina jasaý salasynda ashylǵan bir jumys orny ilespe salalarda 5-6 jumys ornyn ashady. Indýstriialandyrý baǵdarlamasy qolǵa alynǵannan beri mashina jasaý salasynda 114 joba iske asty. Salany yntalandyrý úshin Úkimet qosymsha qun salyǵy boiynsha jeńildikter berip, jeńildetilgen nesie, lizing, eksporttyq qoldaý sharalaryn usynyp otyr. «Óndiristik kooperatsiia» baǵdarlamasy qolǵa alyndy. Osynyń arqasynda otandyq mashina jasaý ónerkásibine «Global-2000» tizimine enetin Alstom, General Electric, SMS, Jac-Motors, Hyundai siiaqty iri transulttyq korporatsiialarmen áriptestik ornady», - degen ministr eksport aiasyn arttyrý úshin álemdik brend óndirýdiń alǵashqy qadamdary jasalyp jatqanyn atady.
«Eksportqa shyǵaratyn ónim aiasy keńip keledi. Biz qosymsha qunnyń ǵalamdyq tizbegine sátti ene bastadyq. Sáýir aiynda koperatsiialyq bailanystyrdy damytý úshin Resei men Qazaqstan arasynda birlesken áreketter jospary qabyldandy. Osy aida Hyundai avtomiobilderin shyǵaratyn Qazaqstandaǵy tuńǵysh zaýyt irgesin qalady. Qytaimen seriktestik aiasynda kólik dóńgelekteri men qozǵaltqyshtaryn jasaityn zaýytty iske qosý josparlanǵan. Qazirdiń ózinde mashina jasaý salalarynyń arasynda avtomobil óndirisi kósh bastap tur. Bul sózsiz qýanarlyq jait. Búginde bizde avtokóliktiń barlyq sanaty óndiriledi. Elimizde 167 avtomobil modeli qurastyrylady. Onyń ishinde 39 jeńil kólik modeli, 22 álemdik brend shyǵarylady. Inýdstriialandyrýdyń eki besjyldyǵynda iri jelilik qurastyrýdan usaq jelilik qurastyrý deńgeiine shyqtyq. 2010 jyldan beri óndiris kólemi 8 ese artyp, 4000 danadan 32 myń danaǵa jetti. Avtoóndiristiń mashina jasaý salasyndaǵy úlesi 19 paiyzdy qurap otyr. Biyl da osyndai ósim deńgeii saqtalatyn túri bar. Qazirdiń ózinde 56 paiyz ósimge qol jetkizildi», -dedi Roman Skliar.
