QR Indýstriia jáne infraqurylymdyq damý ministri Qaiyrbek Óskenbaev Batys Qazaqstan oblysynyń joldaryn 2023 jyly deiin jóndep bitirýge ýáde berdi, dep habarlaidy QazAqparat.
«Memleket basshysy bul joldardy biyl qoldanysqa berýdi tapsyrǵan bolatyn. Óitkeni bul adamdardyń ómirimen tikelei bailanysty. Ókinishke qarai, munyń obektivti de, sýbektivti de sebepteri bar. Birinshi kezeńde qarjylandyrý kólemi jetkiliksiz boldy. Bul jóndeý jumystaryn tutas jumyldyryp uiymdastyrýǵa múmkindik bermedi. Biraq bul bizdi, osy iske bailanysy bar jaýapty qyzmetkerlerdi jaýapkershilikten bosatpaidy. Joldar qaitken kúnde de salynyp bitedi», - dedi Qaiyrbek Óskenbaev Úkimet otyrysynan keiin BAQ ókilderine bergen suhbatynda.
Sondai-aq, ol bul óńirdegi jol jóndeý jumystary tolyq atqarylǵansha ministrlik pen «QazAvtoJol» mamandary Batys Qazaqstanda turyp jumys isteitinin eske saldy.
«Olardyń ishinde «QazAvtoJol» kásiporny tóraǵasynyń orynbasarlary men ministrlik mamandary bar. Olar bul baǵytta biylǵa josparlanǵan jumystar tolyq aiaqtalǵansha sonda bolady.
Keshe men merdigerlerdi jinap, keste qurdyq. Jóndeý jumystaryn barynsha jyldamdatýdy tapsyrdym. Batys Qazaqstanda jol qurylysyna qajetti qiyrshyq tas pen inertti matreialdar joq. Ne Aqtóbe oblysynan, ne Resei Federatsiiasynan ákelý kerek. Negizi merdigerler tenderge qatysar kezde bul siiaqty logistikalyq máselelerdiń bárin aldyn ala pysyqtaý kerek bolǵan. Qazir «QTJ»-ny shaqyrdyq. Olar barynsha kómek kórsetip jatyr. Negizgi mindet merdigerlerdiń moinynda. Óitkeni qajetti qarajat der kezinde bólingen bolatyn. Biyl joldy ashsaq, kelesi jyly tutas jumysty támamdaimyz», - dedi ministr.
