Importtyń ornyn almastyrý úshin shyǵarylatyn ónim básekege qabiletti jáne sapasy joǵary bolýy tiis. Bul týraly búgin Úkimet otyrysynda QR Premer-Ministri Álihan Smaiylov aitty, dep habarlaidy QazAqparat.
«Importtyń ornyn almastyrý úshin shyǵarylatyn ónim básekege qabiletti jáne sapasy joǵary bolýy tiis. Sondyqtan ortalyq jáne óńirlik deńgeidegi barlyq memlekettik organdar júieli jáne úilesimdi jumys isteýi qajet», - dedi Álihan Smaiylov.
Osyǵan orai Premer-Ministr memlekettik jáne jergilikti atqarýshy organdarǵa birqatar naqty tapsyrma berdi.
«Birinshi, óńir ákimdikteri Indýstriia jáne Ulttyq ekonomika ministrlikterimen birlesip, import almastyrý jobalaryn iske asyrý úshin qajetti infraqurylymdy ýaqytynda júrgizip berýdi qamtamasyz etsin. Barlyq jobalar josparlanǵan merzimge sai iske qosylýy tiis. Ekinshi, Indýstriia ministrligi múddeli memlekettik organdarmen, «Báiterek» holdingimen birlesip, jobalardy qarjylandyrý máselesin pysyqtasyn», - dedi Úkimet basshysy.
Álihan Smaiylov úshinshiden, Saýda ministrligine múddeli memlekettik organdarmen birlesip, ST-KZ sertifikattaryn alý tetigin, onyń ishinde tiisti sertifikattardy berý fýnktsiiasyn Saýda ministrligine qaitarý máselesin qaraýdy tapsyrdy.
«Tórtinshi, Bilim ministrligi Eńbek, Indýstriia, Energetika, Aýyl sharýashylyǵy, Densaýlyq saqtaý, Ulttyq ekonomika, Qarjy ministrlikterimen birge óndiristerdi ýaqytynda iske qosýdy qamtamasyz etý úshin bilikti kadrlardy daiyndaý máselesin pysyqtasyn. Besinshi, Indýstriia ministrligi ortalyq jáne jergilikti atqarýshy organdarmen birlesip, aitylǵan tásilderdi eskere otyryp, 16 mamyrǵa deiin Importty almastyrý jónindegi baǵdarlamanyń jobasyn pysyqtap, Úkimetke engizsin», degen Álihan Smaiylov bul máselelerdi baqylaýdy ustaýdy orynbasary Roman Skliarǵa júktedi.
