Ońtústik Qazaqstan oblysynyń ákimi Janseiit Túimebaev Sairam aýdanyndaǵy sańyraýqulaqtyń qozyquiryq túrin ósiretin «AgroGreen» JShS-niń jumysymen tanysty. Jylyna 200 tonna qozyquiryq óndirýge qaýqarly kásiporyn jylyjai túrinde jasaqtalǵan. Mundaǵy qural-jabdyqtar Polsha men Gollandiia elderinen satyp alynǵan. Osy jyly iske qosylǵan kásiporynda 11 adam turaqty jumyspen qamtylyp otyr, dep habarlaidy "Ult aqparat" óńir basshysynyń baspasóz qyzmetine silteme jasap.
Oblysta qozyquiryq ósirýde eń alǵashqy iri joba bolyp tabylatyn sharýashylyqtyń jumysymen tanysqan aimaq basshysy kásipkerdiń jumysyna rizashylyǵyn bildirdi.
«Búgingi kúnge atalǵan ónim túri shetelden (Polshadan) Qazaqstanǵa jylyna 280 tonna kóleminde importtalýda. «Agro Greens» JShS tolyq qýattylyqqa shyqqan jaǵdaida elimizdiń ishki naryǵyn tolyq qamtamasyz etip, artylǵan ónimin shetelge eksporttaýǵa múmkinshiligi bar. Búgingi tańda jobany tolyq qýattylyqqa shyǵarý úshin ainalym qarajatqa 30 mln teńge kóleminde «Ońtústik» AIO arqyly nesielik qarjy bólinip otyr», - dedi ákim.
Budan bólek, J.Túimebaev atalǵan joba otandyq «noý-haý» saýda-sattyq taýary bola alatynyn jáne onyń erekshe tehnologiiamen júzege asyrylyp otyrǵanyn atap ótti.
Seriktestik ósirgen ónimin Qaraǵandy, Almaty, Shymkent qalalaryna ótkizýde. Kásiporyn basshysy Ferýza Karimovanyń aitýynsha, jobaǵa bas-aiaǵy 572 mln 500 myń teńge jumsalypty.
Qozyquiryqtyń A15 sortyn ósirip shyǵaratyn ferma tuqymdy Gollandiia elinen ákeledi. Fermada kólemi 280 sharshy metr bolatyn 12 kamera bar. Munda egilgen qozyquiryq úsh aida daiyn bolady. Iaǵni, sharýalar jylyna 4 ret ónim egip ala alady.
Munan soń oblys ákimi Aqsýkent aýylynda ornalasqan «Birlik -4» JShS-de júrgizilip jatqan qurylys jumystarynyń barasymen tanysty. Jalpy aýmaǵy 5 gektardy quraityn jobanyń jalpy quny 2016,7 mln teńge. Onyń 350 mln teńgesin kásipker «Biznestiń jol kartasy - 2020» baǵdarlamasy aiasynda alǵan. Kásiporyn 2018 jyldyń shilde aiynda iske qosylady dep kútilýde. Joba qýattylyǵy 1,2 mln banka kókónis konservileý jáne 40 myń tonna kókónis saqtaýǵa múmkindik beredi. Kásiporyn tolyq iske qosylǵanda 200 adam turaqty jumyspen qamtylmaq.
Qazir munda konservileý tsehynyń qurylysy aiaqtalyp, qural-jabdyqtarǵa tapsyrys berilip qoiǵan. Sondai-aq kókónis saqtaityn 8 dana qoima qurylysyn salý josparlanyp otyr. Búgingi tańda siymdylyǵy 5 myń tonnalyq 1 qoima iske qosylǵan. Basqa qoimalardyń qurylysy aiaqtalý satysynda. Barlyq qoimalardyń jalpy siymdylyǵy 40 myń tonnany quraidy.
Jumystyń barysymen qanyqqan oblys ákimi agrarly aimaq úshin mundai qoimalardyń asa qajet ekenin atap ótti.
