Qazaqstandyq DJ Imanbek Zeikenov GQ erler jýrnalynyń "Jyl jańalyǵy" nominatsiiasyndaǵy syilyǵyna usynyldy, - dep habarlaidy Tengrinews.kz.
Imanbekten basqa bul marapatqa Fedor Fedotov pen Vladimir Onohov siiaqty akterler, Soda Luv atty mýzykant, rejisser Evgenii Sangadjiev usynyldy.
Eske salaiyq, 20 jastaǵy Imanbek Zeikenov "Gremmi" júldesin jeńip alǵan alǵashqy qazaqstandyq atandy. Ol syilyqty SAINt JHN-nyń Roses kompozitsiiasyna remiksi úshin aldy. Imanbek tanymal bolǵanǵa deiin Aqsý qalasynda temirjolshy qyzmetinde jumys istegen. Osy ýaqyt ishinde ol Rita Ora, Usher, David Guetta, 50 Cent, Sean Paul jáne Sofia Reyes siiaqty álemge áigili ártistermen remiks pen trekter jazyp úlgerdi.
Sonymen qatar, GQ syilyǵynyń basqa, "Ekrandaǵy tulǵa" nominatsiiasyna óskemendik stendap komik Evgenii Chebatkov usynyldy, al pavlodarlyq Skriptonit "Jyl mýzykanty" sanatyna usynyldy. Rejisser Timýr Bekmambetov jyldyń úzdik prodiýseri retinde syilyqqa úmitker.
