31 arna I’m a Singer talant-shoýynyń qazaqstandyq nusqasyn jasaýǵa kiristi, - dep habarlaidy "Ult aqparat" kaz.tengrinews.kz portalyna silteme jasap.
Halyqaralyq kasting maýsym aiynda bastalady: iriktelgen 14 úmitker eń úzdik ánshi degen ataqqa talasady. Kasting tek qana elimizdiń aimaqtarynda ǵana ótpeidi. Qazaqstan alǵash ret Qyrǵyzstannan, Ózbekstannan, Reseiden, Ýkrainadan kelgen qatysýshylardy qabyldaidy. Shoýǵa sondai-aq QHR-dan kelgen ártister de qatysady.
"I’m a Singer formaty Got Talent, X Factor, The Voice siiaqty janrlyq jaǵynan uqsas jobalardan aitarlyqtai ózgeshe, - dep jazdy óziniń Feisbýktegi paraqshasyna 31 arnanyń Bas direktory Baǵdat Qojahmetov. - Oǵan tek qana kásibi mýzykanttar, bolmasa tóltýma talanttar ǵana qatysa alady. Orkestrdiń nemese kásibi djaz-bendtiń súiemeldeýimen álemdik estradanyń ártúrli janrdaǵy sýperhitteri ǵana oryndalady. Al eń bastysy, joba qatysýshylaryn suryptaý mehanizmi múlde basqasha ádispen júredi: ánshilerge stýdiiadaǵy kórermender daýys beredi, odan soń eń myqty degen jeti qatysýshy iriktelip, barlyǵy finalǵa deiin án salady da, sońynda solardyń úsheýi ǵana jeńimpaz atanady. Mundai ádis telekórermenderdi kóptep tartýǵa kómektesedi. Sondai-aq kórermen shoýdyń finalynda ózine unaǵan ánshini aina-qatesiz anyqtaýǵa múmkindik alady.
Eske salaiyq, I’m a Singer jobasynyń qytailyq nusqasynyń sońǵy maýsymynda qazaqstandyq ánshi Dimash Qudaibergenov álemdik deńgeidegi juldyz atanǵan edi. Onyń týma talanty, erekshe joǵary, biregei daýys diapazony, sonymen birge kútpegen jerden tańdalǵan repertýardy sátti oryndaýy básekelesterin basyp ozýǵa ǵana emes, álemdik shoý-biznes sahnasynyń jaryq juldyzyna ainalýyna kóp yqpal etti. Dimashtyń jankúierleri ǵana emes, bizdiń sarapshylar da mýzykalyq serialitidiń naǵyz jeńimpazy qazaqstandyq oryndaýshynyń bolǵanyn moiyndap otyr.
Alaida shoý prodiýserleri Dimash Qudaibergen I’m a Singer jobasynyń qazaqstandyq nusqasyna qatysa ma jáne qandai formatta bolady degen suraqqa jaýap berýden ázirshe bas tartty.
"Biz ázirshe bar qupiiany jaiyp sala almaimyz, - dep, Qazaqstandaǵy nusqanyń bastalýy jaiynda óz pikirin bildirdi 31 arnanyń bas prodiýseri Nurjan Muhamedjanova. - Degenmen, I’m a Singer baiqaýy biylǵy jyly Qazaqstannyń eń basty televiziialyq qubylysy ǵana emes, sondai-aq búkil Orta Aziia aimaǵynyń eń basty jańalyǵy bolatynyna senimdimin. Bul eń tańdaýly, eń talantty, kásibi deńgeii eń joǵary, erekshe daryndy, birtýma, eń batyl degen oryndaýshylardyń shaiqasy... Bizdiń elde talanttar kóp. Osy joba arqyly biz sony dáleldemekpiz. Shoýdyń jaryǵy, dybysy, dekoratsiiasy siiaqty kásibi parametrlerine qoiylatyn talaptardy aitpaǵannyń ózinde, osy bir televiziialyq qudiretti dúniege ákelýge eń myqty resýrstar men kúsh jumyldyryldy".
Jeńimpazdyń basty syilyǵy - shoýdyń ǵalamdyq nusqasyna qatysýǵa joldama: talantty jeńimpaz Dimashtyń jetistigin qaitalap, Qytaidy ǵana emes, búkil álemdi aýzyna qaratýǵa múmkindik alady. I’m a Singer baiqaýy 31 arnada qyrkúiek aiynda bastalady. Eki saǵattyq talant-shoý senbi jáne jeksenbi kúnderi praimtaimda tikelei efirden beriledi. 31 arna baiqaýdyń naqty kúni men taim-slotyn jaqyn kúnderi habarlaýǵa ýáde beredi.
