Tórt dúrkin álem chempiony Ilia Ilin densaýlyǵyna bailanysty Ashhabadta qarasha aiynda ótetin aýyr atletikadan álem chempionatyna qatysýdan bas tartty, dep habarlady SportX.kz.
"Men álem chempionatyna qatyspaitynymdy Qazaqstan halqyna qalai aitsam eken dep kóp oilandym. Aqyry osynda jáne qazir jariialaýdy jón dep sheshtim. Omyrtqamnan jaraqat tabylýyna bailanysty álem chempionatyna qatyspaimyn. Jaraqatym aitarlyqtai aýyr", — dedi Ilin.
Chempion tipti aldaǵy sporttyq karerasyna da qaýip tónip turǵanyn jasyrmady.
"Degenmen qatty jabyǵyp júrgen joqpyn, barlyǵy jaqsy. Ashhabadqa jattyqtyrýshy retinde baramyn. Nijat Rahimovty tuǵyrǵa shyǵaramyn, óitkeni biz onymen bir jyl boiy jumys istedik. Zýlfiia Chinshanlomen de birge jattyqtyq. Men bapkerlerge, óz komandama kómektesemin", — dep tolyqtyrdy ol.
Ilia Ilin jankúierlerge bas tartýynyń sebebin túsindirmei, ketip qala almaǵanyn habarlady.
"Álemdik aýyr atletika meniń qatyspaitynymdy túsindi. Barlyǵy tańǵalyp jatyr. Ne aitaiyn! Eki jyl sportpen ainalyspadym. 8-9 ailyq daiyndyq álem chempionatyna qatysýǵa azdyq etedi. Ol ońai sharýa emes. Jasym bolsa 30-ǵa keldi, densaýlyǵym syr berip jatyr. Sońǵy aida daiyndyqty úzip aldym. Aǵzany qalpyna keltirýim qajet. Bul jóninde basshylyqpen sóilesemin. Meni qaida jiberetinin bilmeimin. Dárigerlerdiń keńesin jinaimyz", — dep túiindedi ol.
Aita keteiik, osy jyldyń qyrkúieginde Ilia Ilin sporttan shettetilgennen keiingi alǵashqy júldesine qol jetkizdi. Ol Taldyqorǵanda ótken Qazaqstan chempionatyn jeńip aldy. Osydan keiin jattyqtyrýshylar shtaby Ilindi 1 qarashada Ashhabadta bastalatyn 2018 jylǵy álem chempionatyna qatysýǵa shaqyrǵan edi.
