Jyl basynan beri Jetisý jurty Iliias Jansúgirovtiń 125 jyldyq mereitoiyna qyzý kirisip ketti. Kúni keshe Taldyqorǵan qalasynda aqyn urpaqtary, shyǵarmashylyq qaýym ókilderi jinalyp, úlken as berildi. Sol igilikti isterdiń jalǵasyndai, ótken aptada Aqsý aýdandyq Molyqbai atyndaǵy Mádeniet úiinde mektep oqýshylary arasyndaǵy HII respýblikalyq Iliias oqýlary óte joǵary deńgeide ótip, jurttyń yqylasyna bólendi.
Atalmysh básekege 13 oblys pen qaladan 24 úmitker qatysty. Olar aldymen Iliias ósken ortanyń kórkem tabiǵatyn tamashalap, kóńilderine kóp oi túidi. Sharanyń ashylý saltanaty Aqsý aýdanynyń ákimi Esim Bazarhanov pen ziialy qaýym ókilderiniń qatysýymen aýdandyq Molyqbai atyndaǵy Mádeniet úiinde ótti. Saltanatty basqosýda alǵashqy sóz kezegin alǵan óńir basshysy:
– «Óz eli óz erlerin eskermese, el tegi qaidan alsyn kemeńgerdi» dep sońǵylarǵa úlken ulaǵatty sóz qaldyrǵan Iliias atamyzdyń shyǵarmashylyq, tulǵalyq qarym-qabiletin úlgi etý Máńgilik El bolýdyń jolynda eńbek etip jatqan bizder úshin úlken úlgi. Biylǵy baiqaý Memleket basshysynyń «Rýhani jańǵyrý» baǵdarlamasy men «Uly Dalanyń jeti qyry» atty maqalasyndaǵy tapsyrmalardy oryndaý negizinde qolǵa alyndy. Meni eń aldymen elimizdiń túkpir-túkpirinen kelgen, Iliias atamyzdyń murasyn qunttap júrgen jastardyń kóp ekendigi qýantty. Árine respýblikalyq deńgeidegi baiqaýdyń aýdan ortalyǵynda ótýi de jaýapty jumys. Sol úshin úmitkerlerdiń úmitin úkileý maqsatynda qoldan kelgenniń bárin jasadyq. Baiqaý barysynda bárińniń baptaryń men baqtaryńnyń teń túsip, júldegerler qatarynan kórinýlerińe sáttilik tileimin, – dedi.
Osydan keiin sharanyń shymyldyǵyn Aqsý aýdandyq óner mektebiniń shákirtteri ashty. Ónerpaz jastardy tárbieleýde úlken nátijelerge jetip, halyqaralyq, respýblikalyq deńgeidegi jeńimpazdardy jetildirip júrgen oqý ornynyń shákirtteri baryn saldy. Án aityldy, bi bilendi, kúi shertildi. Eń bastysy, balǵyndardyń taqyldaǵan daýysy, tartymdy erkin de erke qylyqtary kópshilikti tánti etti. Osyndai joǵary kóńil-kúimen bastalǵan báseke tórt kezeńnen turdy. Aldymen úmitkerler Iliiastyń ózi tańdaǵan bir týyndysyn mánerlep oqyp shyqty, sosyn qatysýshy Iliias aqynǵa arnaýyn kóptiń nazaryna usyndy, kelesi kezekte Iliiastyń dramatýrgiialyq shyǵarmalarynan kórinis kórsetildi. Sońynda ádilqazylar ár qatysýshy aldyn ala qalamger shyǵarmashylyǵy týraly jazǵan jeke shyǵarmashylyǵyn jalyqpai oqyp, árbirin belgilengen shart boiynsha baǵalap shyqty.
Bir aita keterligi, bul retki baiqaýda ár qatysýshy búrkenshik at qoldandy jáne baǵalaýshylardyń qoiǵan baly úlken ekran arqyly kópshilik nazaryna usynylyp otyrdy. Ashyqtyq bolǵandyqtan júldegerdi anyqtaýda bura tartar óreskel jaǵdai oryn alǵan joq. Nátijesinde Aqsý aýdany, J.Sydyqov atyndaǵy orta mektep oqýshysy Álibek Begimbekuly bas júldeni qanjyǵasyna bailap, óńir ákimi atynan taǵaiyndalǵan 500 myń teńge arnaiy júldeni jeńip aldy.
«Óskendi jerdiń balasy óreli keledi». Ádilbek kópshiliktiń kózinshe ózine tiesili qarajaty Iliias Jansúgirov atyndaǵy qorǵa usynatynyn jetkizdi. Birinshi oryndy Aqmola oblysy, Kókshetaý qalasynan Ernur Balmashek, ekinshi orynǵa Mańǵystaý oblysynan Jaras Júsipov pen Shymkent qalasynynan Arýjan Nuradin laiyqty dep tanyldy. Al úshinshi oryndy Shymkent, Almaty, Taldyqorǵan qalasynyń oqýshylary qanjyǵasyna bailady.
Qajet ANDAS
