Almatyda «Ile-Alataý» memlekettik ulttyq tabiǵi parkinde ekotýrizmdi damytý boiynsha qurylǵan Qoǵamdyq keńestiń kóshpeli otyrysy ótti, dep habarlaidy QR Ekologiia, geologiia jáne tabiǵi resýrstar ministrliginiń baspasóz qyzmeti.
Shara barysynda Ile-Alataý parki aýmaǵynda qaldyqtardy bólip jinaý alańdary tanystyryldy. Osylaisha, Ile-Alataý qatty turmystyq qaldyqtardy bólek jinaýdyń infraqurylymyn tolyqqandy jasaqtaǵan Qazaqstandaǵy alǵashqy ulttyq park bolyp otyr. Ekologiia, geologiia jáne tabiǵi resýrstar ministrliginiń tapsyrmasymen park aýmaǵynda barlyǵy 31 jańa qaldyq alańdary ornatylyp, ÓKM Operatory (óndirýshilerdiń keńestilgen mindettemeleri) 225 konteiner qoidy. Qurǵaq jáne dymqyl qaldyqty eki bólek salyp áketý úshin Qazaqstanda balamasy joq kólik tehnikasy qurastyryldy.
«2019 jyly Ulttyq parkke 300 901 adam keldi. Bul kórsetkish aldaǵy ýaqytta artady degen joljam bar. Sondyqtan 2030 jylǵa deiin park aýmaǵyndaǵy qatty turmystyq qaldyqtardy suryptaý deńgeiin 85% - ǵa deiin jetkizýdi josparlap otyrmyz. Qaldyq alańdary Alma – Arasan, Muztaý, Qimasar, Aqqaiyn, Qaskeleń, Aqsai, Esik, Túrgen jáne t. b. shatqaldarda ornatyldy», - dedi «Ile-Alataý» MUTP Bas direktory Damir Malgeldiev.
Ekologiia vitse-ministri Erlan Nysanbaev shara barysynda sonymen birge Ile-Alataý ulttyq parkinde 30 «Eko-Sergek» kamerasy ornatylatynyn habarlady. Bul joba jergilikti ákimdikpen birge júzege asyrylady.
«Biz azamattarymyzdyń tabiǵatta tazalyqty saqtaý mádenietine qarap, osyndai sharalar qabyldaýǵa májbúrmiz. Tabiǵat aiasyna demalýǵa kelgender ainalany lastap, ketip jatady. Olar temeki tuqylyn tastaidy, jaqqan ottaryn óshirmei, órtke sebepker bolady. Vandalizm faktileri de kezdesedi. Árine, «Eko-Sergekti» engizýdegi basty maqsatymyz aiyppul salý emes, aǵartý, túsindirý jumystaryn júrgizý»,- dep atap ótti Erlan Nysanbaev.
Kameralar tek týristerdi tártipke salyp qana qoimai, órt shyqqan kezde jedel dabyl qaǵyp, jyldam áreket etýge, brakonerlerdi anyqtaýǵa septespek. Qoqysty suryptap tastaý alańdary men «Eko-Sergek» tájiribesin birtindep basqa ulttyq parkterge de engizý josparda bar. Aitylǵan usynystar Qoǵamdyq keńes músheleri tarapynan tolyq qoldaý tapty. Túrgen, Alma-Arasan shatqaldarynda bolǵan ekotýrizm infraqurylymy, ekologiialyq bilim máselelerin talqylap, usynystaryn bildirdi.
