QR Ákimshilik politsiia komitetiniń tóraǵasy Maqsat Baibolov Almaty jáne Nur-Sultan qalalaryndaǵy sherýler kezinde zardap shekken saqshylar týraly málimet berdi, dep habarlaidy QazAqparat tilshisi.
Ortalyq kommýnikatsiialar qyzmetinde ótken brifingte ákimshilik politsiia komitetiniń tóraǵasy 10-11 maýsym kúnderi Almaty kóshelerinde ne bolǵanyn aityp berdi.
«Maýsymnyń 10-ynan 11-ine qaraǵan túninde Almaty qalasynda kólik ieleri eni 4 metrge deiin jetetin kolonna quryp, Tóle bi jáne Abai dańǵyldaryndaǵy joldy jaýyp tastaǵan. Osy kóshelerdiń boiynda jaiaý adamdar da toptanyp júrip, qiylystarda kólik keptelisin týǵyzyp, aiqai-súreńge basqan. Kóbi ózderin óte agressivti ustady. Al túngi saǵat 1.30-da «Sairan» avtobeketiniń aýdanynda zańsyz aktsiiaǵa qatysýshy kólik jol qozǵalysyn rettep turǵan jol-patrýldik politsiia qyzmetkerin qaǵyp ketken. Saldarynan politsiia ókili oń aiaǵynan jabyq jambas synyǵyn aldy. Júrgizýshi qashpaq bolǵanymen, qolǵa tústi. Oǵan qarsy Qylmystyq kodekstiń 345 baby boiynsha 160 AEK kóleminde aiyppul salý nemese 40 táýlikke qamaý jazasy taǵaiyndalýy múmkin.
Bir top adam mas kúiinde politsiia kóliginiń terezesin taspen shaqqan jaǵdailar da boldy. Zań buzǵandar ustaldy. Zańda mundai áreketter úshin Qylmystyq kodekstiń 293 baby boiynsha jaza qarastyrylǵan. Osy jaittardan keiin aiqai men shýdan úreilengen qala turǵyndarynan 1000-nan astam aryz túskenin aitý kerek», - deidi Maqsat Baibolov.
Onyń aitýynsha, áleýmettik jeli mesendjerlerinde 11-12 maýsym kúnderi bir ýaqytta birneshe qalada kóshe qozǵalysyna kedergi keltirý úshin arandatý aqparattary taraǵan.
«Tipti politsiia ókilderine qarsy turýǵa shaqyrýlar boldy. Buǵan deiin sondai sherýlerdiń birinde jedel áreket etý jasaǵynyń 1 jaýyngerine qarsy arnaiy daiyndalǵan ballon qoldanylyp, saldarynan eki kózin kúiik shalǵan bolatyn. Budan bólek tas pen taiaq laqtyrý oqiǵalary kezdesti», - deidi politsiia ókili.
Maqsat Baibolov politsiia ókilderiniń áreketinde zań sheńberinen shyǵý bolǵan joq degen málimet aitty.
«Tipti politsiia ókilderine ashyq kúsh kórsetý bolǵan kezde de saqshylar arnaiy quraldardy qoldanǵan joq. Qamaýǵa alynǵan azamatar zańǵa sáikes Nur-Sultan jáne Almaty qalalarynyń, Aqmola, Almaty, Qaraǵandy oblystarynyń jaqyn aýdandaryna ornalastyryldy. Ol oryndardyń barlyǵyna tekserý júrgizildi. Qamaýdaǵylar tarapynan ustaý sharty men azaptaý faktilerine qatysty shaǵymdar anyqtalǵan joq. Barlyq qamaýdaǵylar meditsinalyq tekserýden ótkizdi. Eshkim densaýlyq jaǵdaiyna shaǵym aitpaǵan», - deidi ákimshilik politsiia basshysy.
Komitet tóraǵasy ruqsat elilmegen sherýge, aktsiialarǵa qatysý zańsyz ekenin qaitalai eskertip, adamdardyń qaýipsizdigin shekteitin sharalarǵa qatysý zańmen qýdalanatynyn atady.
Aita ketsek, atalmysh brifing barysynda bas prokýratýra ókili Saparbek Nurpeiisov sailaýdan keiingi sherýlerge qatysqan adamdardyń qanshasy qamaýǵa alynǵany týraly BAQ ókilderine málimet bergen bolatyn.
