Foto ashyq derekkózden alyndy
Quqyq qorǵaý organdarynyń qyzmetkerleri 25 qazan – Respýblika kúni kúsheitilgen qyzmet rejimine kóshedi. Bul týraly Ishki ister ministriniń orynbasary Igor Lepeha málimdedi, dep habarlaidy Sputnik Qazaqstan.
"25 qazan – memlekettik mereke. Árine, biz oǵan daiyndalamyz. Biz kúsheitilgen qyzmet rejimine kóshemiz. Qazir ákimdikterden sol kúnderi ótkiziletin barlyq is-shara týraly aqparatty suratyp jatyrmyz. Biz qoǵamdyq tártiptiń saqtalýyn qamtamasyz etemiz", - dedi Lepeha Úkimette ótken brifingte.
Ol áleýmettik jelide 25 qazan kúni kóshege mitingke shyǵýǵa shaqyryp jatqan úndeýlerge túsinikteme berdi.
"DVK (Qazaqstannyń demokratiialyq tańdaýy - esk.) músheleri jasap jatqan úndeýler bar. DVK – el aýmaǵynda qyzmetine tyiym salynǵan zańsyz ekstremistik uiym. Árine, biz olarǵa miting ótkizýge jol bermeimiz", - dedi ministr orynbasary.
Al mitingti ákimdikpen kelisip uiymdastyrǵan azamattardy eshkim ustap áketpeidi.
"Eger mitingtiń orny men maqsaty zańnamaǵa sáikes kelse, ákimdikter ruqsat beredi. Ruqsat etilgen sharalarda biz tek qana kúzetemiz. Tyiym salynǵan jerde, árine, oǵan jol bermeý boiynsha sharalar qabyldaimyz", - dedi Lepeha.
