Qańtar-naýryz ailary aralyǵynda 16 837 Resei azamaty Qazaqstanda ýaqytsha turýǵa ruqsat aldy. Olardyń kóbi Qyzylorda oblysynda turaqtaǵan, dep habarlaidy "Ult aqparat" IIM baspasóz qyzmetine silteme jasap.
«Biyl qańtardan naýryzǵa deiin Reseidiń 16 837 azamaty Qazaqstanda ýaqytsha turýǵa ruqsat aldy. Reseilikterdiń deni Qyzylorda oblysyna keldi. Sondai-aq, Almatyǵa – 2 116, BQO – 1 677 jáne Qostanai oblysyna 1 525 reseilik ornalasty», - delingen habarlamada.
Ishki ister ministrliginiń málimetinshe, Resei Federatsiiasy azamattarynyń negizgi bóligi (8217) eńbek qyzmetin júzege asyrý úshin kelgen.
Sondai-aq, 24 aqpan men 13 sáýir aralyǵynda Qazaqstanda turaqty turýǵa ruqsat alýǵa 677 ótinish qabyldanǵan.
Buǵan deiin 170-ke jýyq Resei azamaty Qazaqstan azamattyǵyn alýǵa ótinish bildirgen, sondai-aq, turýǵa ruqsat suraǵan reseilikter sany artqany habarlanǵan edi.
