© Sputnik / Sanat Imangaliev
Memleket basshysynyń qylmystyq jolmen alynǵan kiristerdi jylystatýǵa qarsy is-qimylda kúsh-jigerdi biriktirý boiynsha tapsyrmasyn iske asyrý sheńberinde ishki ister ministri Erjan Sadenov pen qarjy monitoringi agenttiginiń tóraǵasy Dmitrii Malahov kezdesti, dep habarlaidy «Ult aqparat» Polisia.kz-ke silteme jasap.
Kezdesýde ózara yntymaqtastyq týraly memorandýmǵa qol qoiyldy.
Qujat kiristerdi jylystatýdyń joǵary qaýpimen bailanysty qylmystarǵa qarsy kúreste vedomstvolar arasyndaǵy tyǵyz ózara is-qimyldy kózdeidi.
Kelisim sheńberinde qarjy monitoringi organdarynyń qyzmetkerleri politsiianyń jedel-tergeý toptarynyń quramyna kirip, sondai-aq "follow the money" qaǵidaty boiynsha qarjylyq tergeý ádisi engiziletin bolady.
Mundai yntymaqtastyq kúrdeli qarjylyq shemalardy jáne qylmystardan paida tabatyn adamdardy anyqtaýǵa múmkindik beredi.
Ministr Erjan Sadenov qylmys kiberkeńistikke kóshý arqyly ózgeristerge ushyraǵanyn, qylmystyq jolmen kelgen kiristi jylystatý úshin kóleńkeli quraldar paidalanylatynyn atap ótti.
"Búginde Astana men Qaraǵandydaǵy vedomstvoaralyq jedel-tergeý toptary esirtki saýdasynan túsken iri kiristerdi zańdastyrý jáne pritondardy ustaý faktilerin sátti anyqtaǵan oń mysaldar bar", – dep atap ótti ol.
QMA tóraǵasy Dmitrii Malahov agenttik IIM-di qarjylyq qylmystarmen kúreste senimdi seriktes retinde kóretinin atap ótti. Ol eki vedomstvonyń birlesken is-qimyly qylmystyq kiristerdi zańdastyrý úshin paidalanylatyn qarjylyq shemalardy tiimdirek anyqtaýǵa jáne jolyn kesýge múmkindik beretinin aitty.
Vedomstvo basshylary olardyń osy baǵyttaǵy birlesken jumysy qazirgi zamanǵy syn-qaterlerge qarsy turýdyń jańa deńgeiin qamtamasyz etetinine senimdi.
